Արդեն երկու տարի անազատության մեջ գտնվող Վանաձորի նախկին քաղաքապետ Մամիկոն Ասլանյանի խափանման միջոց կալանքը փոխելու վերաբերյալ այսօր պաշտպանական կողմը դատարանում միջնորդություն ներկայացրեց: Կալանքի տակ մնալը պաշտպանական կողմը համարեց ոչ իրավաչափ, ներկայացրեց հիմնավորումներ: Դատարանը միջնորդության քննությունը համարեց ավարտված ու հեռացավ խորհրդակցական սենյակ որոշում ընդունելու, որը կհրապարակի դեկտեմբերի 6-ին:
Նիստի ավարտից հետո լրագրողների հարցին, թե ինչ ակնկալիք ունի դատարանից, Մամիկոն Ասլանյանը պատասխանեց, որ ուզում է ազատ արձակվել, կերեւա դատարանի որոշումից: Հարցին, թե ինչի համար են ձեզ պատժում, նախկին քաղաքապետը պատասխանեց. «Ընտրություններում հաղթելու, ինչպես բոլորին, որոնք հաղթում են»:
Մեկ այլ հարցին՝ եթե ընտրություն լինի, էլի կմասնակցե՞ք, Ասլանյանը՝ նիստերի դահլիճից հեռանալով, պատասխանեց՝ անպայման. «Ես սիրում եմ հաղթել»:
Հիշեցնենք, որ Մամիկոն Ասլանյանը Վանաձորը ղեկավարում էր 2016 թվականից, մեղադրվում է պաշտոնեական լիազորությունների չարաշահման ու պաշտոնեական կեղծիք կատարելու համար։ Նա կալանավորվեց 2021–ի դեկտեմբերի 16-ին՝ Վանաձորի քաղաքապետի ընտրություններից մի քանի օր առաջ։ Նրա գլխավորած դաշինքը Վանաձորի ավագանու ընտրություններում ամենաշատ ձայներն էր ստացել։
Կարդացեք նաև
Արփինե ՍԻՄՈՆՅԱՆ
