«Հայաքվե» նախաձեռնության օրենքի նախագիծն ԱԺ լիագումար նիստում դրվեց քվեարկության եւ մերժվեց 24 «կողմ», 57 «դեմ» եւ 0 ձեռնպահ ձայներով: Անհրաժեշտ էր 41 «կողմ»:
RA National Assembly session took place
Հիշեցնենք, որ ԱԺ պետաիրավական հարցերի մշտական հանձնաժողովի նիստում նախագծին բացասական եզրակացություն էին երեկ տվել, ՔՊ-ն որոշեց դեմ քվեարկել նաեւ լիագումար նիստում:
Խոսքը «Հայաքվեի»՝ Քրեական օրենսգրքում լրացումներ կատարելու նախագծի մասին է, համաձայն որի՝ ՀՀ անունից Արցախը որեւէ այլ պետության կազմում ճանաչելը, Հայոց ցեղասպանության ճանաչումից հրաժարվելը կամ դրա վտանգավորությունը նսեմացնելը պատժվում է ազատազրկմամբ՝ 10-15 տարի ժամկետով։
Երբ ԱԺ նախագահ Ալեն Սիմոնյանը օրակարգը ներկայացրեց, «Հայաստան» խմբակցության պատգամավոր Արթուր Խաչատրյանն ասաց. «Հերթական անգամ նախագիծը սպանվեց հանձնաժողովի մակարդակում, թույլ չտրվեց, որ այն մտնի ԱԺ լիագումար նիստի օրակարգ: Որպես ԱԺ նախագահ, չե՞ք գտնում, որ ձեր կուսակիցների այս պահվածքը ուղղակի հայկական պառլամենտարիզմը ոչնչացնելուն միտված քայլ է»:
Կարդացեք նաև
Ալեն Սիմոնյանը պատասխանեց. «Որպես ԱԺ նախագահ, գտնում եմ, որ պառլամենտարիզմը ոչնչացնում է նիստերին չգալը, Դոնթի բանաձեւով ընդդիմությանը տրամադրված հանձնաժողովի ղեկավար կազմը չձեւավորելը, խորհրդի նիստերին չմասնակցելը եւ նմանատիպ այլ գործունեությունը: Իսկ ես ինչ եմ գտնում՝ կարծում եմ, օրենքից վեր չի կարելի լինել: Օրենքով նախատեսված շատ հնարավորություններից դուք հրաժարվում եք, հետո գալիս եք այստեղ, երկմտում»:
Արթուր Խաչատրյանը հարցրեց կարո՞ղ է դա ընկալել՝ որպես բաց շանտաժ՝ քանի որ սահմանադրությամբ իրենց վերապահված պաշտոններից հետ են կանչել իրենց մարդկանց, իրենք այսպես շարունակելու են ընդդիմության բոլոր նախաձեռնությունները սպանել:
Ալեն Սիմոնյանը վստահեցրեց, որ ոչ, քանի որ ընդդիմադիրների նախագծեր կան, որ օրենք են դարձել. «Մեր ընտրողները, մեզ սատարող մարդիկ իրենց ընտրած պատգամավորներից, կարծում եմ, գոհ են»:
RA National Assembly session took place
«Հայաստան» խմբակցության քարտուղար Արծվիկ Մինասյանն ասաց. «Հերթական անգամ կամայական մեկնաբանությամբ կանոնակարգի եւ աշխատակարգի մերժվեց նախագիծը: Հիմնական զեկուցողի իրավունքը, որ երաշխավորված է կանոնակարգով, արհամարհվեց: Հանրության համար անհրաժեշտ է ունենալ մի իշխանություն, որն իր նախընտրական խոստումները պահպանում է: Իրականացնում եք ուղիղ հակառակը, չե՞ք մտածում, որ ձեր վարքագիծը ոչ միայն հակասում է պարզ տրամաբանությանը, այլ նաեւ օրենքների անտեսմամբ՝ մեր խորհրդարանը տանում եք անհասկանալի ուղղությամբ»:
Ալեն Սիմոնյանը արձագանքեց. «Ես անկեղծ չեմ հասկանում, թե դուք ի՞նչ գործ ունեք մեր նախընտրական խոստումի հետ: Ձեր նախընտրական խոստումը եթե ձեւավորենք, դուք եկել էիք՝ մեզ սպանելու, մեր գնդակահարությունն էիք բեմադրում եւ ուրախանում դրա վրա, խորոված անում: Ինչ վիրավորանք ասես ասացիք մեր ընտրողներին, այնքան արեցիք դա, որ նույնիսկ վիրավորանք բառը իր արժեքը կորցրեց: Հիմա եկել ասում եք՝ ձեր ընտրողները: Մեր ընտրողների հետ ի՞նչ գործ ունեք: Մեր ընտրողների մի մասը եկել ընտրել է, որ դուք հանկարծակի այստեղ չհայտնվեք: Մի ստվար զանգվածի ցանկությունը այդ մասով կատարել ենք: Իսկ մենք մեր ընտրողների հետ կխոսենք 2026-ին»:
Քաղաքացիական նախաձեռնության լիազոր ներկայացուցիչ Արամ Պետրոսյանը ներկայացրեց նախագիծը, որից հետո այն դրվեց քվեարկության եւ մերժվեց:
Հռիփսիմե ՋԵԲԵՋՅԱՆ
Ընտրողները այդ ամբիոնը օգտագործելու իրավունքը ձեզ տվել են, որ երկրի համար կարևոր, հրատապ ու առաջնային խնդիրները ( որոնք տարիներ շարունակ մեծ հոգս են եղել մարդկանց գլխին) քննարկեք և լուծեք, թե՞ , որ իրար վրա ցեխ շպրտեք, իրար ծաղրեք ու սպառնաք, ԱԺ-ն վերածեք խայտառակ երևույթի , ժամանակ սպանեք ու դրա համար վճարվեք ժողովրդի մուծած հարկերից։ Ներկայիս հայկական աղբամանային անիմաստ, անհամ,բթացնող սերիալներից ոչնչով չտարբերվող անօգուտ վազվզոց ու գզվրտոց։