«ՀայաՔվե» քաղաքացիական նախաձեռնության անդամներն ու աջակիցները Ազգային ժողովի շենքի մոտ բողոքի ցույց էին անում: Նրանք պահանջում էին, որ ԱԺ պետաիրավական հանձնաժողովը դրական եզրակացություն տա «Հայաքվեի» ներկայացրած օրենքի նախագծին, որի դեպքում այն կներառվի դեկտեմբերի 5-ի ԱԺ նիստերի օրակարգում:
Ցույցի մասնակից «ՀայաՔվե» անդամ, Վ. Բրյուսովի անվան համալսարանի ռեկտորի նախկին տեղակալ Ցոլակ Ակոպյանը լրագրողների հետ զրույցում ասաց, որ իր տպավորությամբ՝ ՔՊ-ն տրամադրված եկել է, որպեսզի մերժի իրենց նախագիծը: Չնայած ճնշումներին, Ակոպյանն ասաց, որ շատ քաղաքացիներ չեն կարող ընկրկել եւ հրաժարվել իրենց պայքարից:
«Մասնավորապես ինձ միանշանակ հնարավոր չի ճնշել: Գիտեք, որ որեւիցե հանցանք չեմ կատարել, որեւէ կարգ չեմ խախտել, եթե խոսքը վերաբերում է Քրեական օրենսգրքի այն հոդվածին, որով ինձ մեղադրում էին… Անկեղծ մի բան էլ ասեմ՝ իմ ձերբակալությունը ծիծաղելի է թվում այն ամենի համեմատությամբ, երբ տեսնում ես, թե հազարավոր մարդիկ ինչպես են այս պահին գոյատեւում: Այս պարագայում դու հասկանում ես, որ քեզ հետ ընդամենը ոչինչ է կատարվում: Այնպես որ վստահ եմ՝ ոչ միայն ինձ չեն կարող ճնշել, այլեւ մեր հազարավոր ընկերներին»,-ընդգծեց նա:
Գոհար ՀԱԿՈԲՅԱՆ
