Aravot.am-ի տեղեկություններով, ՀՀ Հակակոռուպցիոն կոմիտեն սկսել է քննել ՀՀ Պաշտպանության նախարարության զորամասերից մեկում որպես հավաքարար աշխատող կնոջ ներկայացրած հաղորդումն առ այն, որ Գյումրու համայնքապետարանի աշխատակիցների կողմից կատարվել է կեղծիք․ իրեն կեղծ տեղեկանք են հատկացրել տներից մեկում հաշվառված ու բնակվող անձանց վերաբերյալ։
Ըստ տիկնոջ ներկայացրած հաղորդման, առաջին կեղծ տեղեկանքը իրեն տրամադրվել է 2022 թվականի հոկտեմբերին Գյումրու համայնքապետարանի ենթակայությամբ գործող «Գյումրու բնակարանների սպասարկում» ՓԲԸ նախկին տնօրեն Հ․Հ․-ի և տեխնիկական հսկիչի կողմից։
Իսկ նոյեմբերի 9-ին այդ նույն ՓԲԸ-ի այլ աշխատակիցների ու տնօրեն Ա․Հ․-ի կողմից է տրվել տեղեկանք, որը, տիկնոջ համոզմամբ, դարձյալ կեղծ է և չի համապատասխանում իրականությանը:
Նրա հաղորդումը և կազմված փաստաթղթերն ուղարկվել են ՀՀ հակակոռուպցիոն կոմիտե:
