Արցախի Պաշտպանության բանակի նախկին հրամանատար Սամվել Բաբայանն այսօր հրավիրվել է 44-օրյա պատերազմի հանգամանքներն ուսումնասիրող քննիչ հանձնաժողով։
«Ես հրավիրվել եմ, համաձայնել եմ ներկա գտնվել ու իրենց հարցերին պատասխանել։ Իսկ ինչո՞ւ պիտի խուսափեմ, եթե ես պատրաստ եմ իրենց բոլոր չի հարցերին պատասխանել»,- լրագրողների հետ զրույցում ասաց Սամվել Բաբայանը։
Հարցին, թե ակնկալիք ունի՞, որ այս հանձնաժողովի շրջանակներում էական բացահայտումներ կլինեն, Բաբայանը պատասխանեց. «Այն հարցերը, որոնք ինձ կուղղեն, ես կպատասխանեմ անկեղծ, մնացածը չգիտեմ»։
Նա հայտարարեց, որ Արցախի հարցը չի լուծվել։ Հարցին, թե ինչպե՞ս է պատկերացնում լուծումը, Բաբայանը պատասխանեց. «Ես առաջարկել եմ կոմիտե ստեղծել, բայց քանի որ Արցախի իշխանություններն իրենց ձեւն ունեն, եւ Հայաստանի ընդդիմությունը համարում է, որ ես խանգարում եմ իրենց պլաններին, դրա համար ձեռնպահ ենք մնացել։ Մենք ունենք շատ խելոք ընդդիմություն, ես չէի ուզի իրենց խանգարել։ Շատ խելոք են, ծրագրեր ունեն, ապագան տեսնում են»։
Կարդացեք նաև
Հարցին, թե Արցախի բնակչության վերադարձը հնարավոր համարո՞ւմ է, նա պատասխանեց, որ տեղյակ չէ, թե իշխանությունն ու ընդդիմությունն ինչ գործողություններ են իրականացնում։ «Ես գիտեմ, թե ես ինչ գործողություններ եմ իրականացնում, բայց չեմ ասի»,- նշեց բա։
Լրագրողները նաեւ հարցրեցին Սամվել Բաբայանին՝ ո՞վ հանձնեց Արցախը։ «Բոլորս միասին, բոլորին նկատի ունեմ՝ Արցախի, Հայաստանի ղեկավարներին՝ ժողովրդի հետ միասին»,- պատասխանեց նա։
Ճշտող հարցին, թե Նիկոլ Փաշինյանին մեղավոր համարում է Արցախը հանձնելու համար, ուղիղ մեղադրո՞ւմ է նրան դրա համար, Բաբայանը պատասխանեց. «Այո, բոլորին եմ մեղավոր համարում։ Ի՞նչ է նշանակում՝ իշխանությանը մեղադրում եմ, իհարկե, բա հո ձեզ չեմ մեղադրելու, իշխանությանն եմ մեղադրելու»։
Անդրադառնալով Արցախի նախկին պետնախարար Գուրգեն Ներսիսյանի հայտարարությանը, թե 44-օրյա պատերազմից հետո Սամվել Բաբայանը հարցաքննվել է Արցախի դատախազությունում, Բաբայանը պատասխանեց. «Հրապարակեք փաստերը, ես նորից եմ ասում՝ ինձ ոչ ոք չի հարցաքննել։ Գուրգեն Ներսիսյանին դիմեք, թող հրապարակի դա։ Ես այդ ամենի պատասխանատվությունը վերցնում եմ ինձ վրա»։
Ռոզա ՀՈՎՀԱՆՆԻՍՅԱՆ
