Առնվազն մոտ ժամանակահատվածում անհնար է, որ հայերը վերադառնան Ստեփանակերտ, Շուշի կամ այն բնակավայրեր, որոնք պատմականորեն եղել են հայկական: Այս մասին այսօր ԱԺ-ում լրագրողների հետ ճեպազրույցում ասաց ԱԺ նախագահ Ալեն Սիմոնյանը:
Նրա խոսքով, շատ կարեւոր է հասկանալ՝ մենք ուղղակի խոսում ենք խաղաղության մասին, թե մտովի պատրաստ ենք գնալ խաղաղության: Նրա խոսքով, այդ խաղաղությունը պետք է կառուցել այսօր՝ բացառելով մարդկանց էթնիկ բաժանումները, էթնիկ զտումները:
Անդրադառնալով ադրբեջանցիների կողմից Արցախում հայկական հետքը ջնջելու գործողություններին՝ Ալեն Սիմոնյանը շարունակեց. «Ադրբեջանը սիրում է ամեն տեղ ասել, որ տարբեր կուլտուրաներ են իր երկրում ներառված, բայց համառորեն ջնջում է ամեն հայկականը՝ սկսած հայերի բռնի տեղահանումից, էթնիկ զտումից, վերջացրած հայկական շինությունների ու եկեղեցիների հիշատակումից»:
Նա նկատեց, որ համաշխարհային պատմությունը հնարավոր չէ մեկ օրում ջնջել կամ թվիթերում հաճախակի գրառում անելով՝ իրականություն փոխել: Ըստ նրա՝ գոյություն ունեն ընդունված պատմական սկզբունքներ, որոնք բոլորի համար նույնն են. «Անիմաստ գործողությամբ են զբաղված: Անընդունելի եմ համարում հայկական հետքն ու պատմությունը, հայկական լեռնաշխարհից ջնջելու փորձերը: Տարիներ առաջ ականատես եղանք՝ ինչպես Նախիջեւանում նույնպես անարգվեցին հայկական գերեզմանները: Մեր նկատմամբ էլ մեղադրանք կա, որ նմանատիպ գործողություններ ենք արել եւ այլն, չեմ ուզում մտնել նման բանավեճի մեջ, ուզում եմ, որ այս պատմությունն օգտագործենք ապագան կառուցելու համար… Մենք, ունենալով հնարավորություն երկուստեք բազմաթիվ մեղադրանքներ բերելու, «30 տարվա օկուպացիաների», տարբեր պատմական քարտեզներ բերելու, պետք է դադար տանք, պետք է խոսենք ապագայի մասին, իրենց ջանքերը պետք է օգտագործեն ապագան կառուցելու համար»:
Կարդացեք նաև
Արփինե ՍԻՄՈՆՅԱՆ
