«Միկա» մարզահամալիրում այսօր մեկնարկած ավագ տարիքի պատանիների բռնցքամարտի աշխարհի առաջնությունում Հայաստանը գերազանց մեկնարկ վերցրեց։
Մրցումային առաջին օրը մեր երկրից ռինգ մտած չորս բռնցքամարտիկները, ասես, խոսքները մեկ արած, յուրաքանչյուրը երեք անգամ նոկդաունի ենթարկեց իր մրցակցին ու բացահայտ առավելությամբ հաղթանակ տարավ, ընդ որում, երկուսը՝ ժամանակից շուտ։
Ամեն ինչ սկսեց 48 կգ քաշային Վաղարշակ Քեյանը, որը կորեացի Սեունգուն Լիին երրորդ ռաունդում երեք անգամ նոկաուտի ենթարկեց։ Ռեֆերիին այլ բան չէր մնում, քան մենամարտը ժամանակից շուտ դադարեցնելը։
Կարդացեք նաև
Իրենց թիմակցից հետ չմնացին 52 կգ քաշային Արեն Խառատյանը եւ 57 կգ՝ Տիգրան Մակիչյանը, որոնք նույնպես մրցավարներին ստիպեցին երեքական անգամ ձեռքի մատները պարզել, համապատասխանաբար, Մոնղոլիայի եւ Կատարի ներկայացուցիչների գլխավերեւում ու բացահայտ առավելությամբ հաղթանակ գրանցել։
Իսկ այն, ինչ արեց 63 կգ քաշային Ալիկ Կճոյանը, պետք էր տեսնել։
Մենամարտը դեռ նոր էր սկսվել, բայց Գերմանիան ներկայացնող մեր հայրենակից Սամվել Աբրեյանը արդեն ի վիճակի չէր այն շարունակել եւ հայաստանցու հարվածներից ամեն անգամ ցավից ծնկի էր իջնում։ Արդյունքը եղավ այն, որ ռինգի մրցավարը երրորդ անգամ տեսարանը կրկնվելուց հետո արդեն պարտավոր էր հայտարարել մարտի ավարտը։
Աշոտ ՀԱԿՈԲՅԱՆ
