ՀՀ երրորդ նախագահ Սերժ Սարգսյանը վերջին շրջանում իր եւ իր ղեկավարած ուժին թիրախավորումները՝ տարբեր, այդ թվում նաեւ ոչ իշխանական քաղաքական ուժերի կողմից, համարում է զրպարտություն եւ ասում է, որ դա սովորական երեւույթ է իր համար՝ արդեն 30 տարուց ավելի:
Այսօր «Դիզվառելիքի գործով» նիստից հետո, լրագրողների հետ զրույցում, նա ասաց. «Ավանդաբար, դա սկսել են անել ադրբեջանցիները, այնուհետեւ, 90-ականների կեսերին, նրանց ձայնակցել են մեր տեղացիները: Իսկ հիմա, առանձնապես ոչինչ չի փոխվել. այդ երգչախմբին միացել են նոր ձայներ, նոր տոնայնությամբ: Չգիտեմ, իրենք գիտակցո՞ւմ են, որ իրենց համարելով ընդդիմադիր, ջուր են լցնում Հայաստանի կառավարիչների ջրաղացին»:
Նույնը, ըստ նրա, որոշ առանձնահատկություններով, վերաբերվում է նաեւ ՀՀԿ-ին:
Բայց, իր գնահատմամբ, կարեւորը սա չէ, այլ այն, որ թիրախավորվել է Հայաստանի հանրապետությունը, պետականությունը:
Կարդացեք նաև
«Իմ խորին համոզմամբ, վերջին հարյուր տարվա ընթացքում, հայ ժողովրդին այսպիսի ողբերգություն չէր պատուհասել: Իհարկե, ընթացքում եղել են բազմաթիվ խնդիրներ, կուլակաթափություն, 30-ականներին ինչ-որ տեղ նաեւ մարդկանց հանիրավի գնդակահարություններ, Հայրենական պատերազմ, որտեղ հարյուր հազարավոր հայեր են զոհվել: Իհարկե, եղել է ավերիչ երկրաշարժ: Բայց այսպիսի ողբերգություն չի եղել եւ այս գիտակցումը, ցավոք, մեր հասարակության մեջ դեռեւս ամբողջովին առկա չէ, որ այդ ողբերգությունն ամենածանր ու ցավոտ հարված է եղել մեր պետականությանը»:
Իշխանության՝ խաղաղության օրակարգի եւ խաղաղության խաչմերուկի մասին խոսելիս էլ Սերժ Սարգսյանն ասաց, որ միշտ համարել եւ այսօր էլ համարում է, որ Արցախի համար պայքարը եղել է Հայաստանի պետականության համար պայքար եւ խնդիրն այդ գիտակցությամբ է ժամանակին առաջ մղվել:
«Ղարաբաղը երբեք Հայաստանի, Հայաստանի պետականության եւ հայ ժողովրդի համար բեռ չի եղել, եղել է փրկօղակ»,- ասաց Սերժ Սարգսյանը՝ հավելելով, որ այս ողբերգությունը մեր պետականության հիմնասյուներից մեկից զրկեց:
Նա ասաց, որ խաղաղության փաստաթուղթ պետք է կնքել եւ ինքը միշտ կողմ է եղել տարածաշրջանում խաղաղությանն ու ԱԺ ամբիոնից ինքն է խոսել փոխզիջումների եւ Աղդամի՝ մեր հայրենիքը չլինելու մասին, մինչդեռ ՔՊ-ականները այդ առիթով իբրեւ ծաղրում էին, նկարվում եւ հայտարարում, որ Աղդամն իրենց հայրենիքն է. արդյունքն էլ եղավ այն, ինչ եղավ: Բայց թե ի՞նչ տեքստ է փորձում համաձայնեցնել եւ ի՞նչ պայմանագիր է փորձում կնքել գործող իշխանությունը, հայտնի չէ: Տարբեր արտահոսքերից հայտնի են դառնում ինչ-ինչ մանրամասներ, որից պարզ է դարձնում՝ հայկական կողմը գնում է անընդհատ զիջումների. «Պարտադրված խաղաղության պայմանագիր, որը նույն կապիտուլյացիան է: Նա կոչվելու է կրկնակապիտուլյանտ: Անարդար խաղաղությունը պատճառ է նոր պատերազմի»:
Այլ մանրամասները՝ տեսանյութում
Նելլի ԳՐԻԳՈՐՅԱՆ
