Ավտոներկրողները դժգոհ են «Հարկային օրենսգրքում փոփոխություններ եւ լրացումներ կատարելու մասին» օրենսդրական նախաձեռնությունից։ Այսօր կառավարության շենքի մոտ մի խումբ ավտոներկրողներ բողոքի ցույց էին անում օրենքի դեմ, որն ընդունվել է ԱԺ-ում նոյեմբերի 16-ին։
Ըստ նրանց՝ փոփոխությամբ սահմանված ավտոմեքենայի իրացումից վճարվելիք հարկերն ու մաքսերը չափազանց են իրենց նման գործարարների համար։
Ընդունված օրենքի համաձայն՝ դեկտեմբերի 1-ից շահութահարկ է սահմանվում ավտոմեքենաների ներմուծմամբ զբաղվող ընկերությունների համար:
Վարդան Օնանյան
Լրագրողների հետ զրույցում «Ամերիքըն գլոբալ գրուպ» միջազգային բեռնափոխադրող ընկերության հիմնադիր, ավտոներկրող Վարդան Օնանյանը, որը «Երկիր մեդիա» ՀԸ-ի լրագրող է, ներկայացրեց խնդիրը։ Նա ասաց, որ օրենքից դժգոհողները հիմնականում ԱՄՆ-ից աճուրդով ավտոմեքենա գնող եւ ներկրողներ են։
Կարդացեք նաև
«Դրսից ներկրած ավտոմեքենաների արժեքները շատ ավելի ձեռնտու են, քան այստեղ գործող արժեքները։ Այդ պատճառով բազմաթիվ են մեր այն հայրենակիցները, ովքեր ցանկանում են, օրինակ՝ 3 ամիս սպասել, բայց ունենալ ավելի լավ, էժան մեքենա։ Խնդիրն այն է, որ մեզ նման ընկերությունները նախնական պայմանագիր են կնքում հաճախորդների հետ, ու փաստացի արձանագրվում է նաեւ մեքենայի գինը՝ գործող օրենքների ու հարկերի համաձայն։ Ամեն բան արվում է սպիտակ դաշտում, ոչ մի գաղտնի բան չկա։ Եվ այն գները, որոնցով մեքենաները դուրս են գալիս աճուրդի, տեսնում են նաեւ ՊԵԿ-ում։ Մեքենաների մաքսազերծումն էլ այդ թվով է կատարվում ու ավտոներկրող ու վաճառողն ինքն է որոշում իր եկամտի չափը»,-ասաց Օնանյանը։
Նրա խոսքով՝ նման ընկերությունները մեծ եկամուտներ չունեն այդ գործից, որովհետեւ, Օնանյանի ձեւակերպմամբ՝ այն դիտվում է մեծածախի սահմաններում․ «Ամեն մեքենայի մեջ նույնիսկ չկախված արժեքից՝ փոքր եկամուտ ենք ունենում։ Հիմա նոյեմբերի 16-ին ընդունած օրենքով մեզ նման ընկերություններին պարտադրվում է ունենալ նվազագույնը 20% շահույթ, որից հաշվարկվեն հարկերը։ Հավատացնում եմ՝ վերջին տասը տարվա փորձը ցույց է տալիս, որ չի եղել դեպք, որ մեկ մեքենայի իրացումից 20% եկամուտ ունենանք»։
Օնանյանի խոսքով՝ օրենքով ավտոներկրողներին պարտադրվում է եթե նույնիսկ այդ 20% շահույթը չլինի, շահութահարկը վճարվի 20%-ի հաշվարկով․ «Ասում են՝ մեքենայի արժեք, բեռնափոխադրման արժեք, մաքսազերծման արժեք ու այդ ամենին կիրառել ½ գործակից ու նոր ձեւակերպել ու հարկ վճարել։ Այսինքն` եթե ավտոմեքենան ինձ վրա նստել է 10.000 դոլար, ես ինչքանով էլ այն վաճառեմ, պետք է արդեն առնվազն 2 հազար դոլարի 18%-ը վճարեմ որպես շահութահարկ»:
Ցույցի մասնակիցները հայտարարեցին, որ այս օրենսդրական փոփոխության հետեւանքով ներկրած մեքենաների արժեքը ստիպված բարձրացնելու են, որպեսզի կարողանան հավելյալ հարկերը վճարել:
Նելլի ԲԱԲԱՅԱՆ
