Նախարար Հակոբ Սիմիդյանն ընդունել է Կառավարության 3-րդ մասնաշենքի մոտ իրենց բողոքն արտահայտող տնտեսվարողներին:
Հիշեցնենք, որ Արարատյան արտեզյան ավազանի ստորերկրյա ջրային ռեսուրսների հյուծման հետ կապված և ձկնաբուծական տնտեսություններում փակ շրջանառու համակարգերի ներդրման խնդիրների իրավակարգավորման նպատակով «Հայաստանի Հանրապետության ջրային օրենսգրքում լրացում կատարելու մասին» օրենքի նախագծով սահմանվել է նոր՝ «հորատանցքի միջոցով ստորերկրյա քաղցրահամ ջրերի օգտագործում իրականացնող փակ շրջանառու համակարգ» հասկացություն, իսկ «Հայաստանի Հանրապետության ջրային օրենսգրքում լրացումներ և փոփոխություններ կատարելու մասին» օրենքում լրացումներ կատարելու մասին» օրենքի նախագծով նախատեսվել է իրավական հիմք՝ հորատանցքի միջոցով ստորերկրյա քաղցրահամ ջրերի օգտագործում իրականացնող ձկնաբուծարաններում փակ շրջանառու համակարգի ներդրման կարգի սահմանման համար։
Քննարկմանը ներկա ձկնաբուծական տնտեսությունների ներկայացուցիչները բարձրաձայնել են օրենքի նախագծի հետ կապված իրենց մտահոգությունները։
Նախարարը ներկայացրել է Արարատյան արտեզյան ավազանի ստորերկրյա ջրային ռեսուրսների ներկայիս վիճակը, մոնիթորինգային ուսումնասիրությունների արդյունքները և հույս հայտնել, որ տնտեսվարողները գիտակցում են, որ իրականացվող փոփոխությունները բխում են ՀՀ յուրաքանչյուր քաղաքացու շահերից, այն է՝ խնայել ջրային ռեսուրսները։
Կարդացեք նաև
Պայմանավորվածություն է ձեռք բերվել շարունակել հանդիպումները արդեն իսկ ձևավորված աշխատանքային խմբի շրջանակում։ Նախարարը և բողոքի ակցիա իրականացնող տնտեսվարողները պայմանավորվել են միասին քննարկել և համատեղ լուծումներ գտնել ձկնաբուծական տնտեսություններում փակ շրջանառու համակարգերի ներդրման հնարավորությունների մասով։
ՀՀ շրջակա միջավայրի նախարարություն
