ԱԺ «Պատիվ ունեմ» խմբակցության ղեկավար Հայկ Մամիջանյանն այսօր վաղ առավոտից հարցաքննվում էր քննչական մարմնում:
«Պարզվեց, որ իմ տեղեկությունների համաձայն՝ հաղորդումը ներկայացրել է Վանաձորի Հելսինկյան գրասենյակի ղեկավար Արթուր Սաքունցը: Ես չգիտեի, որ ինքն իմ արվեստի մեծ ֆանատն է, թող շարունակի նայել, լսել իմ ասածները: Հայրենասիրությունը, հավանաբար, չի սիրում պարոն Սաքունցն ու ամեն անգամ նյարդային բաներ է ունենում այդ բառը լսելուց»,- հարցաքննությունից դուրս գալուց հետո լրագրողների հետ զրույցում ասաց պատգամավորը:
Նա հայտնեց նաեւ, որ նախաձեռնված քրեական վարույթի շրջանակում առայժմ վկայի կարգավիճակ ունի, թեեւ իր համար ակնհայտ է, որ սպասվում է քրեական հետապնդում. «Ակնհայտ երեւում է գործի ընթացքից ու հարցերից, որ պարզագույն քրեական հետապնդում է: Սակայն, սա համադրելով ընկերներիս ու Հայաստանում քաղբանտարկյալների նկատմամբ հետապնդումների հետ, սա նույնիսկ ուշադրության արժանի չէ»:
Պատգամավորը վստահ է, որ այս վարույթով փորձում են ինչ-որ կերպ սահմանափակել իր գործունեությունը, սակայն չի հաջողվի:
Հիշեցնենք, որ հաղորդումը ներկայացվել է սեպտեմբերի 12-ին ԱԺ-ում պատգամավորի ճեպազրույցի ու հաջորդիվ կատարած ելույթի համար, որում, ըստ Հայկ Մամիջանյանի ինքն ասել է՝ եթե Փաշինյանը հերթական անգամ անհամաչափ ուժ կիրառի խաղաղ ցուրարարների նկատմամբ, դրանից հայրենասերները չեն վախենալու: Նա մանրամասնեց, որ նկատի է ունեցել, եթե հերթական անգամ Փաշինյանը որոշի արյուն թափել, ապա դրանից վախեցող չկա:
Կարդացեք նաև
Արփինե ՍԻՄՈՆՅԱՆ
