Գյումրին վաղը սպասում է Իրաքի Հանրապետության նախագահ Աբդ Ալ-Լատիֆ Ջամալ Ռաշիդին։
Պաշտոնական այցով Հայաստանի Հանրապետությունում գտնվող Իրաքի նախագահը Գյումրի կայցելի ՀՀ նախագահ Վահագն Խաչատուրյանի ուղեկցությամբ։
Այս մասին մենք տեղեկացանք նախագահների այցին սպասող գյումրեցի պաշտոնյաներից։
Աբդ Ալ-Լատիֆ Ջամալ Ռաշիդը, մեր տեղեկություններով, հետաքրքրված է Գյումրու տեղեկատվական տեխնոլոգիաների ոլորտով, և իր այցը կսկսի «Թումո» ստեղծարար տեխնոլոգիաների կենտրոնից, որը գտնվում է պատմական այն կառույցում, ուր 1912 թվականին բեմադրվել է «Անուշ օպերան»։ Յուրահատուկ ճարտարապետություն ունեցող կառույցն այդ ժամանակ Ալեքսանդրապոլի ժողովրդական տունն էր։
Կարդացեք նաև
Իրաքի նախագահին կհյուրընկալեն նաև Գյումրու նախկին քաղաքապետ Սամվել Բալասանյանի ընտանիքին պատկանող «Սև Բերդ» ամրոցում։
Հիշեցնենք, որ սեպտեմբերի 5-ին՝ Իրաքի Հանրապետությունում Հայաստանի Հանրապետությունում արտակարգ և լիազոր դեսպան նշանակվեց Գյումրու նախկին քաղաքապետ Սամվել Բալասանյանի ավագ որդին՝ Միսակ Բալասանյանը, որը, ինչպես երևում է, շահագրգռված է Իրաքի նախագահին իր հայրենի քաղաքում, ավելին իր ընտանիքին պատկանող կառույցում հյուրընկալելու ու կոլորիտային Գյումրին ցուցադրելու մեջ։
Դեսպան նշանակվելուց անմիջապես հետո Միսակ Բալասանյանն, Aravot.am-ին տված բացառիկ հարցազրույցում անդրադառնալով Հայաստանի Հանրապետության և Իրաքի Հանրապետության միջև եղած կապերին ու ապրանքաշրջանառության ծավալներին, ասել էր․ «Բնականաբար, արդյունքները գոհացնող չեն ո՛չ ապրանքաշրջանառության, ո՛չ բիզնես կապերի առումով: Փորձելու ենք մեր փորձը ներդնելով՝ հասնել ավելի լավ արդյունքների»:
Նշենք, որ Աբդ Ալ-Լատիֆ Ջամալ Ռաշիդն Իրաքի առաջին նախագահն է, որն այցելում է Հայաստան։
Ինչպես ծանոթանում ենք պաշտոնական լրահոսից, վարչապետ Նիկոլ Փաշինյանի հետ հանդիպման ժամանակ քննարկել են տնտեսության, առևտրաշրջանառության, բարձր տեխնոլոգիաների, էներգետիկայի, ջրային պաշարների, զբոսաշրջային ոլորտներում համագործակցությանը վերաբերող հարցեր։
Նունե ԱՐԵՎՇԱՏՅԱՆ
