«Այո, Հայաստանի Հանրապետությունը պարտավոր է բոլոր ջանքերը գործադրել՝ թե ֆինանսական, թե անվտանգային, թե բարոյական, ապահովելու համար Արցախից բռնի տեղահանված, էթնիկ զտման եւ ցեղասպանության ենթարկված մեր հայրենակիցների արժանապատիվ, բարեկեցիկ կյանքը ՀՀ-ում՝ մինչեւ մեր հայրենակիցները կկարողանան վերադառնալ իրենց հայրենիք, իրենց տուն՝ Արցախի Հանրապետություն՝ մինչեւ Արցախի Հանրապետության քաղաքական կարգավիճակի ճշգրտումը՝ հիմնվելով ժողովուրդների իրավահավասարության եւ ինքնորոշման իրավունքի վրա»,- ԱԺ արտահերթ նիստում ասաց «Հայաստան» խմբակցության պատգամավոր Արթուր Խաչատրյանը։
Նա նշեց, որ ՀՀ կառավարության կողմից ԱԺ քննարկմանը ներկայացված նախագծերը, որոնք վերաբերում են արցախցիներին աջակցություն տրամադրելուն, դրական քայլ է։ «Սակայն չենք կարող անտեսել, որ օգտագործվել է «Լեռնային Ղարաբաղ»։ «Լեռնային Ղարաբաղ» ի՞նչ, Լեռնային Ղարաբաղի Հանրապետություն կամ Արցախի Հանրապետություն։ Քաղաքական մեծամասնությունը, իշխանությունները չեն օգտագործում, վախենում են օգտագործել «Արցախի Հանրապետություն եզրույթը»։ Բանը հասել է նրան, որ կառավարության անդամն ասում է՝ «Արցախ, ներողություն, Լեռնային Ղարաբաղ»։ Ումի՞ց ներողություն, ումի՞ց ներողություն Արցախ բառն օգտագործելու համար։ Կարծում եք՝ թուրքի պահանջի առաջ ընկրկելով՝ հետաձգո՞ւմ եք պատերազմը։ Ինչքան զիջումներ եք գնում, չեք տեսնո՞ւմ, որ թուրքն ավելի է մոտեցնում մեր դռներին, մեր հայրենիքին, ավելի է մոտենում Երեւանին»,- ասաց Արթուր Խաչատրյանը։
Ռոզա ՀՈՎՀԱՆՆԻՍՅԱՆ
