Դատապարտյալի գործով՝ զենքը հանձնելու դեպքում քրեական պատասխանատավոթյունից ազատում նախատեսող խրախուսական նորմի վերաբերյալ
Նախկինում անձն ազատվում էր քրեական պատասխանատվությունից ՀՀ նախկին քրեական օրենսգրքի 235-րդ հոդվածում նշված առարկաները կամովին հանձնելու դեպքում: Գործող իրավակարգավորումների դեպքում անձը կազատվի քրեական պատասխանատվությունից, եթե ՀՀ գործող քրեական օրենսգրքի 335-րդ հոդվածում նշված առարկաները հանձնի մինչեւ իրավասու մարմինների կողմից դրանց գտնվելու վայրի մասին իմանալը:
Քրեական գործով, որը կներկայացնեմ ստորեւ, քրեական գործ հարուցելու պահից մինչեւ անձի կողմից ինքնակամ ներկայանալը, ինքնաձիգը հանձնելը, որեւէ փաստաթուղթ առկա չէ առ այն, թե որտեղ է պահվել զենքը, մինչ ներկայացնելը: Ըստ բողոքաբեր պաշտպանի, մինչ իրավասու մարմինների կողմից դրա գտնվելու վայրի մասին տեղեկություններ ունենալը Մ. Մուրադյանը հանձնել է ինքնաձիգը. «Եթե նույնիսկ պարզվի, որ իրավապահ մարմինները կասկած են ունեցել, որ զենքը, որով կրակ է արձակվել Մ. Մուրադյանի կողմից, ապա դա չի կարող մեկնաբանվել, որպես զենքի գտնվելու մասին տեղեկություն կամ իմացություն»,-նշել էր պաշտպանը:
Միշա Մուրադյանի գործով ՀՀ վճռաբեկ դատարանի քրեական պալատի 2023 թվականի նոյեմբերի 10-ի թիվ ԵԴ/1424/01/21 որոշմամբ Վճռաբեկ դատարանը վերանայել եւ զարգացրել է զենքը կամովին հանձնելու, քրեական օրենքին հետադարձ ուժ տալու պայմանների վերաբերյալ նախկինում արտահայտած իրավական դիրքորոշումները:
Կարդացեք նաև
Վճռաբեկ դատարանը գրավոր ընթացակարգով քննության էր առել ՀՀ վերաքննիչ քրեական դատարանի անցյալ տարվա նոյեմբերի 22-ի որոշման դեմ դատապարտյալ Միշա Մուրադյանի պաշտպան Հ. Անանյանի հիմնարար խախտման հիմքով վճռաբեկ բողոքը: Բողոքը Վճռաբեկ դատարանում էր այս տարվա մայիսի 5-ի որոշմամբ: Պաշտպանի բացառիկ վերանայման հիմքով հարուցվել էր բացառիկ վերանայման վարույթ:
Այս գործով Երեւան քաղաքի ընդհանուր իրավասության դատարանի դատավճռով նա ճանաչվել էր անմեղ եւ արդարացվել նախկին քրեական օրենսգրքի 258 հոդվածի 1-ին մասով (2003 թվին ընդունված), իսկ նույն օրենսգրքի 235-րդ հոդվածի 1-ին մասով նրա նկատմամբ նշանակվել էր պատիժ 1 տարի ազատազրկմամբ, որը պայմանականորեն չեն կիրառել, նշանակվել էր 2 տարով փորձաշրջան:
Դատախազ Վ.Հարությունյանը բողոք էր բերել, որը վերաքննիչ դատարանի կողմից բավարարվել է: Մուրադյանի նկատմամբ 50 000 ՀՀ դրամի չափով տուգանք է նշանակվել, դա գումարվել է 1 տարի ժամկետով ազատազրկմանը, եւ նշանակվել պատիժ ազատազրկում ու տուգանք միաժամանակ: Ի դեպ, առերեւույթ հանցագործությունը կատարվել էր 2011-ին, այսինքն, տվյալ արարքի կատարման համար քրեական պատասխանատվության ենթարկելու վաղեմության ժամկետն էր լրացել:
Ըստ այդ որոշման՝ Վճռաբեկ դատարանն արձանագրել է, որ եթե օրենսդիրը եզրափակիչ դատավարական ակտի բացակայության պայմաններում երաշխավորել է պատիժը մեղմացնող քրեական օրենսդրությանը հետադարձ ուժ տալու հնարավորությունը՝ առանց որեւէ բացառության, ապա վերոնշյալն առավել եւս պետք է կիրառելի լինի՝ իր բովանդակությամբ եւ ծավալով ավելի լայն եւ համընդգրկուն երեւույթի՝ քրեական պատասխանատվությունից ազատելու նկատմամբ։
Ռուզան ՄԻՆԱՍՅԱՆ
«Առավոտ» օրաթերթ
21.11.2023
