«Այսօր ԱԺ-ում հրատապ ռեժիմով կառավարությունը ներկայացրեց նախաձեռնություն, որը կապված էր Պետական կենսաթոշակների մասին օրենքում եւ Պետական նպաստների մասին օրենքում փոփոխություններ կատարելու հետ: Առաջին ընթերցմամբ փաթեթն ընդունվել է, երկրորդ ընթերցմամբ քվեարկությունը ամենայն հավանականությամբ կլինի վաղը: Այս փաթեթի ընդունումը հնարավորություն է տալու կառավարությանը լիազորություն ունենալ ընդունել այն ընթացակարգերը, որոնք հնարավորություն կտան մեր Լեռնային Ղարաբաղից տեղահանված հայրենակիցներին դիմել եւ առանց նոր կենսաթոշակի նշանակման գործընթացների՝ վերականգնել իրենց կենսաթոշակի իրավունքը:
Դրա հիման վրա նրանք կկարողանան ստանալ հոկտեմբեր, նոյեմբեր եւ դեկտեմբեր ամիսների համար կուտակված կենսաթոշակները միանվագ կերպով»,-ասաց Աշխատանքի և սոցիալական հարցերի նախարարի տեղակալ Դավիթ Խաչատրյանը՝ Արցախից բռնի տեղահանված մեր հայրենակիցներին կառավարության «Հումանիտար կենտրոն»-ի կողմից ցուցաբերվող աջակցության աշխատանքների ընթացքը ներկայացնելիս:
Նա հայտնեց, որ օրենքի ընդունումից հետո նախատեսվում է Կառավարության հաջորդ նիստին ընդունել մյուս ընթացակարգերը, ինչի հիման վրա Արցախից բռնի տեղահանված մեր հայրենակիցները կկարողանան դիմումներ ներկայացնել, որպեսզի իրենց կենսաթոշակը հաստատվի ՀՀ կենսաթոշակային հիմնադրամի համակարգում, եւ ՀՀ կենսաթոշակների ու նպաստների չափերին համապատասխան եւ կարգով՝ շարունակվեն վճարվել կենսաթոշակներն ու նպաստները:
Փոխնախարարն ասաց, որ շահառուները պետք է պարտադիր ներկայացնեն դիմումներ, ինչի համար մշակվում է առցանց հարթակ: Հավելեց նաեւ, որ նրանք պետք է ունենան ՀՀ հասցեով հաշվառում:
Կարդացեք նաև
Դավիթ Խաչատրյանը Արցախից բռնագաղթածներին հորդորեց անպայման հաշվառվել, իսկ բնակարանների սեփականատերերին հանգստացրեց, որ դա չի կարող կապ ունենալ իրենց սեփականության իրավունքի հետ եւ ընդամենը հաշվառում է, որը մեր հայրենակիցների բնակության վայրի հասցեի հետադարձ կապի միջոց է:
Գոհար ՀԱԿՈԲՅԱՆ
