ԵԱՀԿ ԽՎ-ում ՀՀ ԱԺ պատվիրակության անդամ Մարիա Կարապետյանը ելույթ է ունեցել Երեւանում ընթացող ԵԱՀԿ ԽՎ աշնանային նստաշրջանի երկրորդ նիստում, երբ քննարկվել են կոռուպցիայի դեմ համատեղ պայքարի մեխանիզմները, անվտանգության սպառնալիքները:
«Շնորհակալ եմ, տիկին փոխնախագահ,
Հարգելի՛ գործընկերներ,
Հաճելի է ձեզ բոլորիդ տեսնել Հայաստանում:
Կարդացեք նաև
Մեր այս նիստի թեման կոռուպցիայի եւ անվտանգության սպառնալիքների միջեւ կապն է: Այս առումով, իհարկե, խաղաղության եւ անվտանգության ամենամեծ սպառնալիքն այն է, երբ զենք է վաճառվում կոռումպացված ռեժիմներին, քանի որ կոռումպացված ռեժիմներն այդ զենքերն օգտագործում են ոչ թե իրենց երկրների օրինական ինքնապաշտպանության համար, այլ իրենց ռեժիմները պաշտպանելու համար:
Այնուամենայնիվ, ես կցանկանայի տեղափոխել մեր քննարկումը դրական դաշտ եւ խոսել այն մասին, թե ինչպես է կոռուպցիայի դեմ պայքարը նպաստում խաղաղությանը եւ անվտանգությանը:
Կոռուպցիայից զերծ պետությունն ու հանրությունն անխուսափելիորեն կապված են ժողովրդավարական, թափանցիկ, հաշվետու ինստիտուտների, ասել է թե առողջ ինստիտուտների հետ՝ բանակից մինչեւ ընտրական ինստիտուտներ, դպրոցներից մինչեւ նախարարություններ: Իսկ սա նշանակում է դիմակայանություն: Դիմակայունությունը կարեւոր պաշտպանական վահան է ժամանակակից հանրությունների համար, հատկապես` հիբրիդային պատերազմների դարաշրջանում, որոնք ներառում են ոչ միայն սովորական սպառազինություն, այլեւ տեղեկատվական տեխնոլոգիաներ, գաղափարախոսություններ, ինչ ասես:
Այսպիսով, հենց այս ըմբռնումով է, որ մենք Հայաստանում համատեղել ենք Հարավային Կովկասում տարածաշրջանային խաղաղության մեր ձգտումները ներքին բարեփոխումների խիստ օրակարգի հետ՝ ներառյալ կոռուպցիայի դեմ պայքարը:
Թույլ տվեք ընդգծել սա՝ այս աշնան ամիսներին ինչպես Հայաստանի խորհրդարանում, այնպես էլ աշխարհի տարբեր խորհրդարաններում ընթացող բյուջետային քննարկումներով: Մենք համեմատում ենք 2024 թվականի բյուջեի թվերը 2018 թվականի բյուջեի թվերի հետ: Սրա պատճառն այն է, որ 2018 թվականը շրջադարձային էր Հայաստանի ժողովրդավարացման համար:
Այսպիսով, 2024 թվականին Հայաստանի բյուջեում եկամուտները կկազմեն 2018 թվականի բյուջեի եկամուտների ավելի քան կրկնապատիկը: 2024 թվականի կապիտալ ծախսերը եռապատկվելու են 2018 թվականի կապիտալ ծախսերի համեմատ: Մեր առողջապահության բյուջեն 2018 թվականի առողջապահության բյուջեի կրկնապատիկն է լինելու: Մեր կրթության բյուջեն 2018 թվականի կրթության բյուջեի ավելի քան կրկնապատիկ է լինելու:
Ինչպե՞ս է հնարավոր դարձել ընդամենը մի քանի տարում կրկնապատկել բյուջեի եկամուտները: Շնորհիվ միայն կոռուպցիայի դեմ անողոք պայքարի եւ ազատ տնտեսության: Եվ մենք վստահ ենք, որ ներքին եւ արտաքին խաղաղության մեր ճանապարհը կապված է ավելի դիմակայուն եւ ավելի ժողովրդավարական Հայաստան ունենալու հետ:
Շնորհակալություն»,- նշել է պատգամավորը:
ՀՀ Ազգային ժողով
