«Բա որ 1996 թվականին արդեն Ղարաբաղի խնդիրը լուծված-վերջացած էր, էլ ձեւ չկար Ղարաբաղի ինքնորոշման իրավունքին, կար միայն Հայաստանի հանրապետության հարց, բա 2014-ին ո՞նց էիր պառլամենտում կողմ քվեարկում Արցախի անկախությանը, Նիկոլ: Բա 2015-ին ո՞նց էիր ասում՝ երրորդ նախագահն իրավունք չունի որեւէ փոխզիջման գնալ: Բա թիմակիցներդ ո՞նց էին գնում Աղդամում նռերով նկարվում՝ ասում էին՝ Աղդամն իմ հայրենիքն է: Բա ո՞նց էիր գնում Շուշիում տրնգի պարում, դո՞ւ էիր ազատագրել Շուշին…»,- այսօր «Հենարան» մամուլի ակումբում՝ դիմելով Նիկոլ Փաշինյանին, ասաց ՀՀԿ գործադիր մարմնի անդամ, ԱԺ նախկին փոխխոսնակ Էդուարդ Շարմազանովը՝ նրան նաեւ հիշեցնելով «թավշյա հեղափոխության» շրջանում եւ դրանից հետո ԱԺ ամբիոնից արած իր հայտարարությունները, որ «բոբո ՀՀԿ-ականները» Արցախի հարցում փոխզիջումների էին գնում, իսկ ինքն ու իր հեղափոխությունը Արցախին բերելու են ինքնիշխանություն եւ անկախություն, արցախահայության իղձերի իրականացման:
Հիշեցնենք, օրերս խորհրդարանում, Նիկոլ Փաշինյանը հայտարարեց, որ առնվազն 1996 թվականից՝ Լիսաբոնի գագաթաժողովից, Արցախի հարցը լուծված է եղել ու դրված է եղել ՀՀ-ի հարցը:
«Արցախահայության իղձերն անհայրենիք ու անտուն մնա՞լն էր»,- հարց հնչեցրեց բանախոսը:
Լիսաբոնում՝ Արցախի հարցը լուծված լինելու մասին Նիկոլ Փաշինյանի հայտարարությունն Էդուարդ Շարմազանովը «զառանցանք» է որակում եւ հիշեցնում հարցի կարգավորման ժամանակագրությունը՝ ամենաբարձր մակարդակով ստորագրված փաստաթղթերը եւ Ադրբեջանի նախագահի պահվածքն այդ շրջանում:
Կարդացեք նաև
«Զատիկից հետո ներկած ձուն ո՞ւմ է պետք»,- սա էլ Էդուարդ Շարմազանովի դիտարկումն է՝ ԱՄՆ-ի կողմից Ադրբեջանին ռազմական օգնությունը դադարեցնելու՝ երեկ ընդունված բանաձեւին: Բանախոսի դիտարկմամբ, եթե դա չի արվել 44-օրյա պատերազմի ժամանակ, դրանից հետո, ավելին, Ադրբեջանը հայտարարվել է ԱՄՆ-ի վստահելի գործընկեր, այժմ այն որեւէ նշանակություն չունի:
Այլ մանրամասները՝ տեսանյութում
Նելլի ԳՐԻԳՈՐՅԱՆ
