«ՄՏՍ-Հայաստան» հեռահաղորդակցության ոլորտի խոշոր օպերատորի վաճառքի մասին մանրամասներ բարձր տեխնոլոգիական արդյունաբերության նախարար Ռոբերտ Խաչատրյանը չի հայտնում։ Այսօր կառավարության նիստից հետո ճեպազրույցում լրագրողները նախարարից հետաքրքրվեցին՝ ինչու կառավարությունը փոխեց դիրքորոշումը, մինչ այդ հայտնում էին, որ վաճառքը կարող է վնասել ազգային անվտանգության շահերը։
Նախարարն ի պատասխան ասաց, որ ընկերության հայտն ու տեղեկատվությունը գործընկերների հետ ստուգվել է, որից հետո համաձայնություն է տրվել։
Թե ո՞վ է իրական գնորդը, սեփականատերը՝ որպես ֆիզիկական անձ, այս հարցին էլ ի պատասխան նախարարն ասաց, որ գիտի, թե ով է գնորդը, բայց չի ասի․ «Մենք գիտենք՝ ով է գնորդը, չեմ ասի՝ ով է»։
«Գրավոր դիմեք»,-լրագրողների պնդմանն այսպես արձագանքեց Խաչատրյանը։
Կարդացեք նաև
Հիշեցնենք, որ «ՄՏՍ-Հայաստան»-ը դիմել էր Հանրային ծառայությունները կարգավորող հանձնաժողով թույլ տալու ընկերության 100% բաժնետոմսերը Կիպրոսում գրանցված «Ֆեդիլքո Գրուպ Լիմիթիդ»-ին վաճառելու համար։ ԲՏԱ նախարարությունը Հանձնաժողովին նոյեմբերի 9-ին հայտնել է, որ գործարքի կայացման վերաբերյալ իր իրավասությունների շրջանակում առարկություններ չունի՝ գրությանը կից ներկայացնելով հայտի առնչությամբ դիտողություն չունենալու վերաբերյալ ՀՀ ԱԱԾ դիրքորոշումը։
Մինչդեռ այս տարվա ապրիլին Մրցակցության պաշտպանության հանձնաժողովն արգելել էր «Ֆեդիլքո Գրուպ Լիմիթիդ» ընկերությանը ձեռք բերել «ՄՏՍ Հայաստան» ՓԲԸ-ի բաժնետոմսերը․ «Գործարքի համաձայնեցումը կարող է մերժվել, եթե համաձայնություն ստանալու համար ներկայացված փաստաթղթերը և (կամ) տեղեկատվությունը չեն համապատասխանում Հանձնաժողովի սահմանված կարգի պահանջներին, ինչպես նաև իրավասու մարմնի գնահատմամբ վնասում է կամ կարող է վնասել ազգային անվտանգությանը կամ պետական շահերը»։
Թե կոնկրետ ի՞նչ փոխվեց, որ այժմ ընկերության վաճառքը ազգային անվտանգության շահերին չի հակասում, նախարարը լրագրողների այս հարցերին այդպես էլ հստակ չպատասխանեց։
Նելլի ԲԱԲԱՅԱՆ
