ՌԴ Դաշնային խորհրդի նախագահի տեղակալ Յուրի Վորոբյովը թելեգրամում գրառում էր կատարել ՀՀ դպրոցներում ռուսերեն դասագրքերի բաշխման գործընթացը կասեցնելու մասին: Թեմայի վերաբերյալ Aravot.am-ի հարցմանն ի պատասխան ԿԳՄՍ նախարարությունից հետեւյալը փոխանցեցին. «Ռուսական կողմի դասագրքերը սահմանված կարգով ներկայացվել են փորձաքննության, որը ՀՀ օրենքի պահանջ է:
Հանրակրթության մասին օրենքի համաձայն՝ ՀՀ դպրոցներում կիրառվող դասագրքերը, մեթոդական ուղեցույցները եւ մնացած նյութերը պետք է անպայման փորձաքննություն անցնեն, որպեսզի հիմնավորվի դրանց համապատասխանությունը հանրակրթության չափորոշչին:
Տվյալ պարագայում խոսքը շուրջ 30 անուն դասագրքի մասին է, որոնք նախատեսված են ռուսերենով ուսուցմամբ դասարաններում կիրառության համար: Մենք հանրապետությունում ունենք շուրջ 45 ռուսերենով ուսուցմամբ դասարաններ: Անկախ նրանից, թե ինչ լեզվով է կատարվում ուսուցումը, պահանջները, ուսումնական ծրագրերի համար սահմանված են նույն վերջնարդյունքները, ուսումնական նույն նպատակները, հետեւաբար դրանք պետք է փորձաքննվեն: Բացի այդ՝ հաշվի առնվելով, որ Հանրակրթության նոր չափորոշիչն արդեն տեղայնացվել է այս տարվանից հանրապետության բոլոր դպրոցներում 2-րդ, 5-րդ եւ 7-րդ դասարաններում, բնականաբար համապատասխանությունը շատ կարեւոր է»:
ԿԳՄՍ նախարարությունից նաեւ փոխանցեցին. «Արգելվելու, կասեցվելու մասին խոսք չկա, ինչպես արդեն նշվեց, դասագրքերն ընդամենը ներկայացվել են փորձաքննության, ինչը հնարավորինս արագ կկազմակերպվի»:
Գոհար ՀԱԿՈԲՅԱՆ
