«Խաղաղության պայմանագիրը կարող է այս տարվա վերջին ստորագրվել, եթե կա այդ ցանկությունը»,-այսօր ԱԺ-ում լրագրողների հետ զրույցում ասաց ԱԺ նախագահ Ալեն Սիմոնյանը:
Նա նշեց, որ կա անվստահության մթնոլորտ. «Ադրբեջանական կողմն էլ է հարցնում՝ իսկ ո՞վ է ասել, որ Հայաստանը 10 տարի հետո, 30 տարի հետո չի հարձակվելու մեզ վրա: Ինչո՞ւ եք մտածում, որ ադրբեջանական կողմը այդ մտավախությունը չունի: Ունեն եւ բարձրաձայնում են: Մենք այդ աշխատանքի մասին ենք խոսում, որը այս պահի դրությամբ դրական միտում ունի եւ ժամկետ ենք արդեն քննարկում լրագրողների հետ»:
Անդրադառնալով ՀԱՊԿ-ի նիստին չմասնակցելու որոշմանը՝ Ալեն Սիմոնյանն ասաց. «Երբ ՀԱՊԿ-ից ասում են՝ մենք պատրաստ էինք, դուք չուզեցիք, որտե՞ղ էին իրենք պատրաստ, որտե՞ղ էին գալու կանգնեին, որտե՞ղ էին գործողություններն անելու, եթե իրենք ասում են՝ Հայաստանի ու Ադրբեջանի սահմանը չի խախտվել: Ո՞նց թե չի խախտվել, Ջերմուկինը չի՞ խախտվել, մնացած տեղերում չի՞ խախտվել: Եթե սահմանը ամորֆ ինչ-որ բան է, ապա որտե՞ղ էր գալու այդ դիտորդական առաքելությունը եւ ի՞նչն էր դիտարկելու: Այնպես որ, այդ աճպարարությունը մեզ համար անընդունելի է»:
Ըստ Ալեն Սիմոնյանի, բելառուս ու ղազախ զինվորները չէին գալու կռվեին մեր համար,եթե անգամ քաղաքական գնահատական չի եղել:
Կարդացեք նաև
Հռիփսիմե ՋԵԲԵՋՅԱՆ
