Միգրենն աշխարհի ամենատարածված նյարդաբանական խանգարումներից մեկն է, որն այս պահին բուժում չունի։ Հիվանդության դեմ օգտագործվող դեղամիջոցներն ու տրիգերներից խուսափումը սոսկ միտված է ախտանշանների թեթևացմանն ու միգրենի նոպաների հաճախականության կրճատմանը։
Սակայն այժմ Իսլանդիայի հետազոտողների կողմից անցկացված մեծամասշտաբ ուսումնասիրության շնորհիվ հայտնաբերվել են 44 հազվադեպ գեներ, որոնք կապված են աուրայով և առանց աուրայի ուղեկցվող միգրենի հետ, և ինչպես հայտարարել են հետազոտության հեղինակները, այդ հայտնագործությունները լայն հնարավորություններ են ստեղծում միգրենի բուժման նոր մեթոդների մշակման համար։
Հետազոտությունը հրապարակվել է Nature Genetics ամսագրում։
Ինչպես նշում են հեղինակները, նոր արդյունքներն ապացուցում են, որ աուրայով ուղեկցվող միգրենն ու առանց աուրայի միգրենը երկու բոլորովին տարբեր վիճակներ են, որոնք հիմնված են ոչ թե պացիենտների անհատական ընկալումների վրա, այլ կենսաբանական տարբեր հիմքեր ունեն։
Կարդացեք նաև
Այս հետազոտության անցկացման համար փիլիսոփայության դոկտոր Գիդա Բյորնսդոթիրն ու իր թիմը ուսումնասիրել են ավելի քան 1,3 միլիոն մասնակիցների գենետիկ տվյալներ՝ հայտնաբերելով միգրենի հետ կապված 44 գենային հազվադեպ տարբերակներ, որոնցից 12-ը նոր են բացահայտվել։ Դրանցից մեկը PRRT2 գենն է, որը կապված է եղել աուրայով միգրենի և էպիլեպսիայի զարգացման վտանգի մեծացման հետ։ Եվս մեկ հազվադեպ տարբերակ է KCNK5 գենը, որը պաշտպանում է ծանր միգրենից ու ուղեղի անևրիզմայից։
Հեղինակները դրական են գնահատում իրենց ուսումնասիրության արդյունքները՝ նկատելով, որ դրանք կնպաստեն բուժման նոր մեթոդների մշակման հարցում։
Հետազոտության հաջորդ քայլը միգրենի՝ սեռային առանձնահատկությունների ուսումնասիրությունն է։
Ինչպես նշում են փորձագետները, այս հետազոտությունը կարող է մեծ ներդրում ունենալ հիվանդության վաղ և ճշգրիտ ախտորոշման հարցում։
Պատրաստեց Մարինե ԱԼԵՔՍԱՆՅԱՆԸ
