ԱՄՆ Ներկայացուցիչների պալատի արտաքին հարաբերությունների հանձնաժողովի Եվրոպայի հարցերով ենթահանձնաժողովի՝ «Լեռնային Ղարաբաղի ապագան» խորագրով լսումների ժամանակ ԱՄՆ Ներկայացուցիչների պալատի ներկայացուցիչ տիկին Տիտուսն առաջարկեց քննարկումներում ընդգծել Թուրքիայի գործոնը։ Հարցրեց՝ Թուրքիան ի՞նչ դերակատարություն կարող է ունենալ խաղաղության գործընթացում, այդ քննարկումներում, ինչպես նաև մտահոգություն հայտնեց, որ ԱՄՆ-ն նաև սպառազինություն է վաճառում Թուրքիային։
ԱՄՆ պետքարտուղարության պատժամիջոցների համակարգման գրասենյակի ղեկավար Ջեյմս Օ-Բրայենը, սպառազինության վաճառքի հետ կապված հարցի առիթով նշեց՝ իրականացվում են մոնիտորինգային գործընթացներ, և երբեք չի տեսել անօրինականության հետ կապված որևէ նշում։ Այնուհետև հավելեց, որ այս առումով Թուրքիայի հետ՝ որպես ՆԱՏՕ անդամ երկիր թափանցիկ են աշխատում․ «Երբ մենք խոսում ենք Թուրքիայի ներգրավմամբ խաղաղության գործընթացի մասին, պետք է հստակ ամրագրենք, որ Թուրքիան ունի բարեկամական հարաբերություններ Ադրբեջանի հետ, բայց կան նաև մի շարք այլ տարրեր։
ՀՀ-ի հետ հարաբերություններում մենք հույս ունենք, որ կլինեն բարելավումներ։ Եվ մենք նաև շատ ուրախ ենք, որ Հայաստանը ավելի է մոտենում Արևմուտքին։ Ինչ վերաբերում է Ադրբեջանի հետ հարաբերություններին, այստեղ ևս կան որոշ տարրեր։ Թուրքիայի կառավարությունն ի վիճակի է իր անունից խոսել, բայց ես ուզում եմ երկու շեշտադրում կատարել։ Այս տնտեսական միջանցքը, որը քննարկվում է, Կենտրոնական Ասիայից դեպի Հայաստան, Ադրբեջան, այնուհետև Թուրքիա, այստեղ ակնհայտ է Թուրքիայի տնտեսական շահը։ Սա մի տարր է, որը խաղաղության նախկին բանակցություններում գոյություն չուներ»։
Ջեյմս Օ-Բրայենը միևնույն ժամանակ կարևորեց Թուրքիայի դերակատարությունը, կառուցողական ներգրավվածությունը բանակցություններում և քննարկումներում․ «Նախագահ Ալիևը կհասկանա, որ ինքը միայնակ չէ իր որոշումների կայացման հարցում, բայց իր՝ երկարաժամկետ գործընկերոջ հետ։ Եվ սա այն դերակատարությունն է, որը կարող է Թուրքիան ունենալ»։
Կարդացեք նաև
Տաթև ՀԱՐՈՒԹՅՈՒՆՅԱՆ
