ԱԺ նիստում 2024 թվականի բյուջեի նախագծի քննարկման ժամանակ «Հայաստան» խմբակցության պատգամավոր Լիլիթ Գալստյանը հայտարարեց, որ բուհերն այսօր առավել քան երբեւէ կուսակցականացված են։ «Կառավարման խորհուրդների ՔՊ-ացումն ուղղակի անհերքելի է, իսկ քաղաքական հայացքների համար դասախոսների հետապնդումը հրապարակային է, ցինիկ եւ անպատժելի, ինչը տեղի ունեցավ նաեւ ինձ հետ, երբ ճակատիս պարզապես ասացին՝ քո քաղաքական վարքագծի համար ժամեր չես ստանա»,- ասաց Գալստյանը։
Իր ելույթում Լիլիթ Գալստյանը քննադատեց կառավարությանն` անարդյունավետ ծախսեր իրականացնելու համար։ «Անարդյունավետ կամ մսխված ծախսերի տասնյակ էջեր կարելի է լցնել՝ Սնուփ Դոգին նվիրած 8 մլն դոլարից մինչեւ 9 տոկոսանոց քաղաքապետի 220 հազար դոլարանոց բեմադրությունը կամ լուծարված ու գոյություն չունեցող ՏՏ ընկերություններին 180 մլն դրամի հատկացումը»,- ասաց նա՝ քննադատելով նաեւ դասագրքերի ոլորտում վարվող քաղաքականությունը։
Պատգամավորին արձագանքեց ԿԳՄՍ նախարար Ժաննա Անդրեասյանը․ «Տիկին Գալստյան, դասագրքերի ոլորտում աղմուկը շատ է մի պարզ պատճառով՝ տարիների մոնոպոլիա է կոտրվել։ Մի դասագրքի համար մենք տարիներ շարունակ պետական բյուջեից միայն տպագրության համար վճարել ենք 1044 դրամ։ Այս պահին դասագրքի ստեղծման, փորձաքննության, տպագրության համար վճարում ենք 741 դրամ։ Դաշտն ազատականացվել է, հայտնվել են նոր մասնակիցներ։ Բովանդակության համար կաշխատենք, անհոգ եղեք, 30 տարվա խնդիրները միանգամից չեն լուծվում»։
Ժաննա Անդրեասյանը հավելեց․ «Ես ձեր փոխարեն չէի խոսի բուհերի կուսակցականացվածության, քաղաքականացվածության եւ մնացած խնդիրներից։ Կլռեի ուղղակի այդ մասին։ Ես ինքս դասախոս եմ եղել տարիներ շարունակ եւ իմ վրա եմ զգացել այն բոլոր խնդիրները, որ ունեցել է կրթական համակարգում ներգրավված անձը, այդ թվում՝ քաղաքական հետապնդման իմաստով։ Պիտի խնդրեմ մի օրինակ բերեք որեւէ բուհի խորհրդի կուսակցականացվածության, ու դուք դա չեք կարող բերել։ Որեւէ բուհի առաջ դրված չէ քաղաքական խնդիր, եւ որեւէ բուհ ներգրավված չէ որեւէ հարցում։ Բուհում մեր բոլոր աշխատանքներն ուղղված են միայն նրան, որ թույլ չտանք այդ գործունեությունն այլ կուսակցությունների ու խմբերի կողմից»,- ասաց Ժաննա Անդրեասյանը։
Կարդացեք նաև
Ռոզա ՀՈՎՀԱՆՆԻՍՅԱՆ
