Regionmonitor. Վրաստանի ԱԳ նախարար Իլիա Դարչիաշվիլին Վրաստանի «Առաջին ալիքին» տված հարցազրույցի ժամանակ, անդրադառնալով հարավկովկասյան զարգացումներին, նշել է, որ վրացական կողմի հիմնական նպատակն է ապահովել խաղաղություն և կայունություն տարածաշրջանում։ Դարչիաշվիլիի խոսքով, Հայաստանն ու Ադրբեջանը սկսել են բացեիբաց խոսել խաղաղության անհրաժեշտության, խաղաղության համաձայնագրի ստորագրման մասին, և նրանց նարատիվն ամբողջությամբ կենտրոնացած է խաղաղության վրա։
🔺 Դարչիաշվիլին, պատասխանելով այն հարցին, թե արդյո՞ք ադրբեջանական, այնուհետև վրացական լրատվամիջոցներում տարածված տեղեկատվությունը Վրաստանի տարածքով Ֆրանսիայից Հայաստան զրահատեխնիկա մատակարարելու մասին կխոչընդոտի հայ-ադրբեջանական հարաբերությունների կարգավորման հարցում Վրաստանի՝ որպես միջնորդի կարևոր դերին, նշել է․ «Ցանկացած երկիր իրավունք ունի ունենալ պաշտպանական ուժ, իսկ երբ խոսքը վերաբերում է սովորական տեխնիկայի կամ միջազգային պայմանագրերով թույլատրված զինատեսակների, ցանկացած երկիր իրավունք ունի ձեռք բերել այն։ Վրաստանի դիրքորոշումն այն է, որ երկու երկրներին էլ հնարավորություն ընձեռվի օգտվել տրանզիտային գործառույթից, որն ունի մեր երկիրը հավասար պայմաններում։ Ըստ այդմ, սա է մեր պատասխանն այս հարցի վերաբերյալ, և այդ հարցում անհարկի ակնարկներն անտեղի կլինեն»։
🔺Խոսելով «3+3» ձևաչափի մասին՝ Դարչիաշվիլին նշել է, որ Վրաստանը չի մասնակցում այս ձևաչափին և չի մասնակցի ապագայում՝ հավելելով, որ Վրաստանը երկկողմ ձևաչափերով շատ լավ, բարեկամական հարաբերություններ և համագործակցություն ունի Թուրքիայի, Հայաստանի և Ադրբեջանի հետ։
