2022-ից հետո Հայաստանի ՊՆ-ն սպառազինության ձեռքբերման բազմաթիվ պայմանագրեր է կնքել։ Ռազմական փորձագետ Կարեն Վրթանեսյանի խոսքով՝ պարզ չէ, թե այդ պայմանագրերից որքանն է կատարվել, որքանը կկատարվի եւ որքանը երբեք իրականություն չի դառնա։ «Ցավոք, սպառազինության գնումների ոլորտում միշտ չէ, որ ստորագրած պայմանագրերն իրականություն կարող են դառնալ։ Իշխանությունների՝ սպառազինության ձեռքբերման մասին հայտարարություններն ու ճոխ ցուցադրությունները շատ բան չեն նշանակում։ Առհասարակ, սպառազինության գնումները բավականին բարդ ոլորտ են ու պետք է լինեն համակարգված։ Եթե մի քանի թնդանոթ առնում ես Հնդկաստանից, մի քանի զրահամեքենա՝ Ֆրանսիայից, մի ուրիշ բան՝ այլ տեղից, հարց է առաջանում․ այդ ամենը միասին ո՞նց են ներդաշնակ աշխատելու»,- նշեց նա։
Ռազմական փորձագետը նկատում է․ Հայաստանը երեք տարի է՝ ոչ մի խոշոր զորավարժություն չի անցկացրել, եւ հարց է առաջանում՝ այդ զենքերը մարտական գործողությունների ժամանակ աշխատելո՞ւ են, թե՞ ոչ։ «Մինչեւ վերջերս մենք Հնդկաստանից մեծ ծավալով զինամթերքի ներկրման փորձ չենք ունեցել, հարց է՝ արդյո՞ք ռազմական իրավիճակում դրանք նորմալ կաշխատեն, թե՞ ոչ։ Այս իշխանությունները նույնիսկ ռազմական ցուցահանդեսի չկարողացան մասնակցել, չուզեցին հասցնել ցուցանմուշների ցուցադրությունը։ Ես չեմ կարծում, որ այս իշխանությունները նպատակ ունեն ապահովել Հայաստանի անվտանգությունը»,- ասաց Վրթանեսյանը։
Լիա ՍԱՐԳՍՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
