«Ազատություն»․ Լեռնային Ղարաբաղից հեռացած մարդիկ իրավունք ունեն տուն վերադառնալու և այդ իրավունքը պետք է պահպանվի, երեկ, ամենօրյա ճեպազրույցում, պատասխանելով լրագրողներից մեկի հարցին, ասել է ԱՄՆ Պետդեպարտամենտի խոսնակ Մեթյու Միլլերը:
Լրագրողը, մասնավորապես, հետաքրքրվել էր խոսնակից, թե Կոնգրեսում կայանալիք լսումներից առաջ ուզում է իմանալ՝ ինչ են պատրաստվում ասել լսումներին Լեռնային Ղարաբաղի ապագայի հարցով՝ շեշտելով՝ «մի կողմից ունեք Ադրբեջան, որը տոնում է հաղթանակը՝ ռուսական բանակով շրջապատված քաղաքում և ունեք Հայաստան, որին Ռուսաստանն ամեն օր բռնության է ենթարկում՝ ասելով, որ ոչ մի տեղ չեմ գնա, ես ոչ մի տեղ չեմ գնալու։ Ձեր կարծիքով՝ այստեղ երջանիկ ավարտ կա՞»։
Միլլերը պատասխանել է․ – «Ես ուղղակի կասեմ այն, ինչ նախկինում ասացի. Ես չեմ ուզում խոսել վաղը կայանալիք լսումների մասին, բայց կասեմ, որ մենք շարունակում ենք հավատալ, որ Լեռնային Ղարաբաղից հեռացած մարդիկ իրավունք ունեն վերադառնալու տուն, եթե ցանկանում են դա անել, և այդ իրավունքը պետք է պահպանվի»։
