Դաշտանադադարը բնական կենսաբանական գործընթաց է, որի հետ կապված տարբեր թյուրըմբռնումներ կան․ այս վիճակի հետ կապված առավել տարածված «առասպելներն» են․
Առասպել 1․ Մենոպաուզան տեղի է ունենում, երբ դաշտանային ցիկլերն անկանոն են դառնում․ Իրականում դաշտանադադարն ախտորոշվում է 12 ամիս շարունակ առանց դաշտանի անցնելուց հետո: Մեծ է հավանականությունը, որ մինչ մենոպաուզան որոշ ժամանակ կնոջ մոտ կարող են լինել անկանոն դաշտանային ցիկլեր։ Այդ շրջանն անվանում են հարդաշտանադադար, որը կարող է ձգվել մինչև 8 տարի։
Առասպել 2․ Այդ ընթացքում կինը չի կարող հղիանալ․ Կինը կարող է հղիանալ, քանի դեռ դաշտան տեսնում է, անգամ եթե ցիկլերն անկանոն են: Իհարկե, 45 տարեկանից հետո ավելի փոքր են հղիանալու շանսերը, բայց ամեն դեպքում հղիանալ հնարավոր է։
Առասպել 3․ Դաշտանադադարից հետո սեռական կյանքն ավարտվում է․ Իգական էստրոգեն հորմոնի մակարդակի նվազումը կարող է ազդել սեռական ցանկության վրա, առաջացնել հեշտոցային չորություն, սակայն դա ամենևին էլ սեռական կյանքի ավարտ չի նշանակում։
Կարդացեք նաև
Առասպել 4․ Դաշտանադադարը ենթադրում է հորմոնների ընդունում․ Դաշտանադադարի ախտանշանները հաղթահարելու համար տարբեր մեթոդներ կան՝ ասեղնաբուժություն, ռելաքսացիայի մեթոդների կիրառում, կենսակերպի փոփոխություններ։ Հորմոնային փոխարինման թերապիան դաշտանադադարի ժամանակ կիրառվող միջոցներից մեկն է, որն ունի ինչպես դրական կողմեր, այնպես էլ կողմնակի ազդեցություններ։ Բուժման արդյունավետ եղանակն ընտրում է բժիշկը՝ հաշվի առնելով տվյալ կնոջ օրգանիզմի առանձնահատկություններն ու ախտանշանները։
Առասպել 5․ Մենոպաուզան տեղի է ունենում 40 տարեկանից հետո․ Դաշտանադադարը սովորաբար սկսվում է 45-55 տարեկանում, սակայն կարող է և տեղի ունենալ ավելի վաղ տարիքում։ Որոշ հիվանդություններ, վիրահատություններ և դեղամիջոցներ ևս կարող են վաղ դաշտանադադարի առաջացման պատճառ դառնալ։ Վաղ դաշտանադադարի պատճառը նաև գենետիկ կարող է լինել։
Առասպել 6․ Մենոպաուզայի ընթացքում կինը քաշ է հավաքում․ Էստրոգենի մակարդակի նվազումն ու մետաբոլիզմի դանդաղումը կարող են հանգեցնել քաշի ավելացման։ Սակայն քաշի ավելացումն ավելի շատ կապված է ոչ թե դաշտանադադարի, այլ տարիքի հետ նյութափոխանակության գործընթացների դանդաղեցման հետ։
Պատրաստեց Մարինե ԱԼԵՔՍԱՆՅԱՆԸ
