«Հիմնականում, լինելով արդեն մեկուսացված, քանի որ չունենք այն բարեկամ պետությունները, որոնք մեզ կցանկանային աջակից լինել, հիմա հույսները դրել են Արեւմուտքի վրա, թե Արեւմուտքը մեզ կօգնի: Արեւմուտքը միշտ օգնել է եւ մենք տեսել ենք դրա արդյունքները այլ երկրներում, մենք տեսել ենք, թե դա ինչի է բերում: Հարցն այն է, թե ինչպիսի՞ արտաքին քաղաքականություն պետք է վարվեր մեր երկրում ու մենք ունենք նախարար, որը ես չգիտեմ ի՞նչ լեզվով է խոսում. ասում է՝ «պիպետկայով» էիք ուզում բերել… այո, ԱԳ նախարարի բերանից է այս խոսքը հնչում: Չեմ խոսում, այսպես կոչված, ԱԺ նախագահի բառապաշարի, իր բառապաշարի մասին… «գնացեք բորդյուր կրծեք»… անհարմար էլ ես զգում կրկնել»,- այսօր նախագահական նստավայրի դիմաց իր խոսքում ասաց «Միասին» հասարակական-քաղաքական շարժման համակարգող խորհրդի անդամ Արամ Սարգսյանը:
«Միասին» հասարակական-քաղաքական շարժման անդամները, հիշեցնենք, երեկ հարցադրումներ էին փոխանցել վարչապետ Նիկոլ Փաշինյանին: Թեեւ աշխատակազմից տեղեկացրել էին, որ գրավոր կպատասխանեն, շարժման անդամները, սակայն, ակնկալում էին իրենց հարցերի պատասխանները լսել Նիկոլ Փաշինյանից՝ այսօր նախագահական նստավայրի մոտ: Նիկոլ Փաշինյանը չէր եկել հանդիպման, քանի որ մեկնել էր Փարիզ՝ մասնակցելու Փարիզի խաղաղության 6-րդ կոնֆերանսին՝ նվիրված պաղեստինաիսրայելական հակամարտությանը:
Արամ Սարգսյանը հայտարարեց՝ իրենք նորից կվերադառնան այստեղ, ուղիղ եթերում ստանալու իրենց հարցերի պատասխանները Նիկոլ Փաշինյանից, երբ նա կլինի աշխատավայրում:
Այն քաղաքականությունը, որը վարել եւ վարում է գործող իշխանությունը՝ բանախոսի պնդմամբ, վտանգ է մեր պետության եւ ժողովրդի համար: Այսօր էլ առավել վտանգավոր է թյուրքալեզու պետությունների դիրքորոշումը, որոնք վերջերս Աստանայում կայացած կոնֆերանսի ժամանակ որոշեցին սեփական բանակը ստեղծել՝ գնալով Մեծ Թուրանի ստեղծման գաղափարին, իսկ Հայաստանը այս իրավիճակում անգամ ազգային միասնականություն չունի:
Կարդացեք նաև
«Իրենք շտապում են, արդեն խոսակցություններ են գնում, որ արտահերթ ընտրություններ են ուզում անցկացնել եւ դրա իմաստը իրենց վերարտադրությունն է՝ ահաբեկելով քաղաքական ուժերին: Տեսնում եք նաեւ, թե ինչքան են քաղբանտարկյալները օր-օրի ավելանում: Խնդիր է դրված՝ գնալ նոր ընտրությունների, որպեսզի ստանան ինդուլգենցիա՝ ևս 5 տարի կառավարելու. չի կարելի սա թույլ տալ»,- ասաց Արամ Սարգսյանը:
Նելլի ԳՐԻԳՈՐՅԱՆ
