Արցախից բռնի տեղահանված մեր հայրենակիցները 50 հազար դրամ միանվագ սոցիալական աջակցություն կստանան նոյեմբեր եւ դեկտեմբեր ամիսների համար։ Այսօր կառավարության նիստում հաստատվեց այս մասին որոշումը։
Աջակցության շահառուներն են 100 հազար դրամ ստացած արցախցիները։ Նրանք, ովքեր ժամանակավոր բնակվում են հյուրանոցներում կամ հյուրատներում՝ այս աջակցությունը չեն ստանա, ինչպես նաեւ ծրագրի շահառու չեն ՀՀ-ում չգտնվող, բանկային հաշիվներում 2 միլիոն դրամից ավելի գումար ունեցող անձինք։
«Խոսքը ոչ թե ընտանիքի անդամների մասին է, այլ հենց նրանց, ովքեր ունեն իրենց հաշիվներում այդ գումարը։ Բացառություն են զինծառայության ապահովագրության հիմնադրամից հատուցում ստացող անձինք»,-պարզաբանեց աշխատանքի եւ սոցիալական հարցերի նախարար Նարեկ Մկրտչյանը։
Բացի այս, ըստ նախարարի, աջակցության շահառու չեն լինի մինչեւ բռնի տեղահանումը ՀՀ-ում գտնվող անձինք։
Կարդացեք նաև
Աջակցությունը տրամադրելու համար պետբյուջեից նախարարությանը կտրամադրվի 10 մլրդ դրամ։
Այն անձինք, ովքեր մինչեւ նոյեմբերի 15-ը դուրս կգան հյուրանոցներից կամ հյուրատներից, նրանք նույնպես կարող են դառնալ այս ծրագրի շահառու։
Փոխվարչապետ Տիգրան Խաչատրյանն ասաց, որ ստուգման գործընթացում, եթե պարզվի, որ աջակցությունը ստացել են այն անձինք, ովքեր չպետք է ստանային, գումարը հետ կգանձեն։
Մինչ կառավարության նիստի օրակարգին անցնելը՝ կառավարությանը անդամները մեկ րոպե լռությամբ հարգեցին 44-օրյա պատերազմում նահատակվածների հիշատակը։
Մանրամասն՝ տեսանյութում
Նելլի ԲԱԲԱՅԱՆ
