Արցախից բռնի տեղահանված 104,200 քաղաքացիների վճարվել է ՀՀ կառավարության 100 հազար դրամ միանվագ աջակցությունը․աջակցություն ստացածներից 75,725-ը չափահաս քաղաքացիներ են, 28,475-ը՝ անչափահաս։ Այս մասին այսօր կառավարության հումանիտար կենտրոնում հայտնեց աշխատանքի եւ սոցիալական հարցերի նախարար Նարեկ Մկրտչյանը։
Նրա ներկայացմամբ՝ 40+10 հազար դրամ աջակցությունն այսօրվա դրությամբ վճարման է ուղարկվել 92,525 անձի, որից 5358-ը`10 հազար դրամ, 87,167-ը՝ 10+40 հազար դրամ։
Բռնի տեղահանված մեր հայրենակիցներն այսօրվանից սկսած կարող են էլեկտրոնային հարթակում ներկայացնել դիմումները, որից հետո վճարումները կտրամադրվեն։
Ինչպես օգտվել էլեկտրոնային հարթակից՝ մանրամասն տեսանյութում
Կարդացեք նաև
Նարեկ Մկրտչյան անդրադառնալով վերջին շրջանում բռնի տեղահանվածների այն մտահոգություններին, ըստ որի՝ փախստականի կարգավիճակ ստանալու դեպքում զրկվում են կենսաթոշակի կամ նպաստի իրավունքից, ասաց՝ նրանք կշարունակեն ունենալ կենսաթոշակի եւ նպաստի իրավունք՝ եթե ՀՀ օրենսդրությանը համապատասխանեն։
«ԼՂ-ում կենսաթոշակ կամ նպաստ ստացած հանգամանքից անկախ՝ բռնի տեղահանված անձինք ձեռք կբերեն կենսաթոշակի եւ նպաստի իրավունք։ Քանի որ որոշակի բյուրոկրատական գործընթացներ կարող էր առաջ գալ, դա շրջանցելու համար օրենսդրական փոփոխություններ ենք նախաձեռնել, այն հաստատելուց հետո կկարողանանք մեր հայրենակիցներին, որոնք կենսաթոշակի կամ նպաստի իրավունք են ունեցել, կշարունակենք տրամադրել նպաստ ու թոշակ։ Բայց եթե Հայաստանում գտնվելու ժամանակահատվածում լրացել է անձի կենսաթոշակային տարիքը, նրանք անպայման պետք է դիմեն միասնական սոցիալական ծառայության տարածքային գրասենյակներ, իրավունք ստանալուց հետո նրանց կենսաթոշակը տրամադրվելու է հոկտեմբերի 28-ից սկսած»,-ասաց նախարարը։
Կենսաթոշակ կամ նպաստ տրամադրելու համար օրենքով պարտադիր է, որ ՀՀ –ում բնակության վայրում հաշվառված լինեն, ուստի, ինչպես Մկրտչյանը նշեց, բռնի տեղահանված մեր հայրենակիցները մինչեւ տարածքային կենտրոն դիմում ներկայացնելը պետք է հաշվառվեն այն հասցեում, որտեղ բնակվում են։
Նելլի ԲԱԲԱՅԱՆ
