Երեւանի քաղաքապետ Տիգրան Ավինյանի՝ «շների հետ պարոնով չխոսել» հրահանգը ավագանու «Հանրային Ձայն» խմբակցության անդամները իրենց ղեկավարին՝ «Դոգ» մականունով Վարդան Ղուկասյանին չեն շտապում վերագրել:
«Ցույց տվեք այդ ձայնագրությունում մի տեղ, որ Տիգրան Ավինյանը նման բան է ասել՝ շեշտելով Վարդան Ղուկասյանի անունը, շեշտելով «Հանրային Ձայն» կուսակցության անունը: Իսկ ո՞վ է ասում, որ Ավինյանի ասած «շներին պարոնով չդիմելը» հենց «Հանրային Ձայն» կուսակցությանն է վերաբերվում կամ Վարդան Ղուկասյանին: Հիմա ամեն «շուն» ասելուց պետք է ասենք ի՞նչ, սա ի՞նչ մոտեցում է: Ես Տիգրան Ավինյանին խորհուրդ կտամ հասկանալ՝ իր նիստերն ով է ձայնագրում, հրապարակում կամ ուղարկում լրատվականներին: Սա ամենակարեւոր բանն է, որ Տիգրան Ավինյանը պետք է անի՝ պարզի, թե ով է իրեն դավաճանում իր անձնակազմի մեջ: Չէ՞ որ դա դավաճանություն է, ձայնագրել խոսակցությունը, ապա տալ լրատվականներին», -Aravot.am-ին ասաց ավագանու «Հանրային Ձայն» խմբակցության անդամ Նանա Սարգսյանը:
Նանա Սարգսյանի լուսանկարը՝ ֆեյսբուքյան էջից
Նա նաեւ նկատեց, որ այն աշխատանքը, որը կատարում է «Հանրային Ձայն» կուսակցությունը, դեռ այսքան տարիների ընթացքում ոչ մի կուսակցություն չի կատարել. «Մենք հինգ ավագանիով կատարում ենք մի ամբողջ քաղաքապետարանի աշխատանք: Կարող եք հարցում ուղարկել քաղաքապետին ու ճշտել, թե «Հանրային Ձայնը» այս մեկ ամսվա մեջ քանի հարց է լուծել ու քանի խնդիր է դեռ սպասման մեջ ու համեմատական անցկացնել ավագանու մյուս անդամների աշխատանքի հետ»:
Կարդացեք նաև
Արփինե ՍԻՄՈՆՅԱՆ
