Արցախյան ցավալի իրադարձություններից հետո, Արցախի բնակիչների բռնի տեղահանման առաջին իսկ ժամերից ՀՄԸՄ ՀԱՍԿ-ը Կենտրոնական Վարչության որոշմամբ և անդամների ակտիվ ներգրավմամբ, լծվեց մեր հայրենակիցների առաջնային պահանջների, այն է տաք հագուստի և հիգիենայի ապրանքների հավաքագրման և տրամադրման գործին։
Սկսվեց Արցախցիների մեծ հոսք դեպի ՀՄԸՄ ՀԱՍԿ-ի գրասենյակ որտեղ նրանք ստանում էին տաք հագուստ, անկողնային պարագաները և հիգիենայի ապրանքներ: Հավաքվեց շուրջ 450 ընտանիքների տվյալների բազա, որը հետագային փոխանցվեց Արցախի օժանդակությունը համակարգող հանձնախմբին:
Հայ օգնության միության (ՀՕՄ)-ի Հայաստանի շրջանային վարչության հետ սեպտեմբերի 29-ին իրականացվեց շուրջ 100 արկղ ապրանքների տեղափոխում Գորիս, որտեղ այդ օրերին տեղահանված հայրենակիցների առաջին հանգրվանն էր:
Նույն ժամանակահատվածում սկսվեց աշխատանքները Արցախի մեկուսի շրջանից տեղահանված քույրերի և եղբայրների հետ կապեր հաստատելու, իրենց կարիքները ճշտելու և հնարավորինս օժանդակելու ուղղությամբ:
Սույն աշխատանքը ավելի մեծ թափ հավաքեց ՀՄԸՄ 13-րդ Ընդհանուր Պատգամավորական Ժողովի ընթացքում ընդունված բանաձևերի լույսի տակ: Առաջացած ֆոնդի նպատակներից ելնելով ՀՄԸՄ ՀԱՍԿ-ի կենտրոնում տեղի ունեցավ մեկուսի շրջանի աստիճանավորների հետ աշխատանքային հանդիպում:
ՀՄԸՄ կենտրոնական վարչության անդամ քույր Սանդրա Վարդանյանի նախաձեռնությամբ կայացավ ՀՄԸՄ ՀԱՍԿ-ի կենտրոնական վարչության և Արցախի մեկուսի շրջանի վարչության համատեղ նիստ, որտեղ քննարկվեց առաջիկա համատեղ անելիքները և ծրագրերը:
ՀՄԸՄ ՀԱՍԿ-ի կենտրոնական վարչությունը փոխանցեց, որ Արցախի մեկուսի շրջանի վարչությանն է տրամադրում կենտրոնում մեկ սենյակ, գրասենյակային կահավորմամբ:
Իսկ հոկտեմբեր 29-ին ՀՄԸՄ ՀԱՍԿ-ի խմբապետական խորհրդի նախաձեռնությամբ Բյուրականի «Գառնիկ Մկրտչյան» բնակավայրում տեղի ունեցավ 150 հոգանոց համատեղ գործունեություն, որի նպատակն էր ՀՄԸՄ ՀԱՍԿ-ի և Արցախի մեկուսի շրջանի սկաուտների միասնական աշխատանքը, մտերիմ մթնոլորտում, Արցախի սկաուտների համար ջերմ և հարազատ միջավայրի ապահովումը, որը իրականացվեց Արցախի ֆոնդից միջոցների տրամադրմամբ:
ՀՄԸՄ ՀԱՍԿ
