ՄԱԿ-ի Կլիմայի փոփոխության 28-րդ համաժողովին ընդառաջ հոկտեմբերի 29-ին UWC Դիլիջանում տեղի ունեցավ Հայաստանի երիտասարդների տեղական համաժողով՝ «ԿԼԻՄԱՅԱԿԱՆ ՃԳՆԱԺԱՄ. ԻՆՉՊԵՍ ՆՊԱՍՏԵԼ ՀԱՂԹԱՀԱՐՄԱՆԸ» խորագրով
UWC Դիլիջանին շնորհվել է Երիտասարդների տեղական համաժողովների (ԵՏՀ) (LCOY) կազմակերպչի կարգավիճակ: Երիտասարդների տեղական համաժողովները կազմակերպվում են Դուբայում նոյեմբերի վերջին կայանալիք ՄԱԿ-ի Կլիմայի փոփոխության համաժողովին ընդառաջ։ ՄԱԿ-ի երիտասարդների ներգրավման ծրագրի շրջանակում ԵՏՀ-ը Հայաստանում անցկացվեց առաջին անգամ:
ԵՏՀ-ին մասնակցում էին 16-18 տարեկան շուրջ 80 երիտասարդ, այդ թվում՝ 65 հոգի Հայաստանի տարբեր ավագ դպրոցներից: Ունեինք մասնակիցներ Երևանից և Շիրակի, Լոռիի, Տավուշի, Արմավիրի մարզերից: Համաժողովին նաև մասնակցում էին երիտասարդներ Ռուսաստանից, Մակեդոնիայից, Ավստրալիայից, Ֆրանսիայից, Նիդեռլանդներից, Պաղեստինից, Հարավային Աֆրիկայից և Սերբիայից:
Հայաստանի ԵՏՀ-ն կրում էր «ԿԼԻՄԱՅԱԿԱՆ ՃԳՆԱԺԱՄ. ԻՆՉՊԵՍ ՆՊԱՍՏԵԼ ՀԱՂԹԱՀԱՐՄԱՆԸ» խորագիրը։ Ուսանողների կողմից կազմակերպված այս համաժողովն անդրադարձավ տեղական խնդիրներին: Հրավիրված հայ փորձագետներն իրենց ելույթներում ներկայացրեցին Հայաստանում առկա իրավիճակը: Համաժողովի ծրագրում ընդգրկվել էին աշխատարաններ կլիմայի փոփոխության խնդրին ուղղված գործնական քայլերի վերաբերյալ:
Կարդացեք նաև
- Շենքերի էներգաարդյունավետություն, խոսնակ` Վահրամ Ջալալյան, «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ՄԱԶԾ-Կանաճ կլիմայի հիմնադրամ համատեղ ծրագիր
- Ջրային անվտանգությունը Հայաստանում, խոսնակ՝ Ալեքսանդր Առաքելյան, Գերմանիայի միջազգային համագործակցության ընկերություն (GIZ) Ջրային ռեսուրսների համալիր կառավարման խորհրդատու (EU4Sevan ծրագիր)
- Կլիմայի փոփոխության վերաբերյալ Հայաստանի քաղաքականությունը՝ խոսնակ՝ Դիանա Հարությունյան, ՄԱԶԾ Հայաստանի ծրագրերի ղեկավար
- Ինչպես կարող է շրջանաձև տնտեսությունն աջակցել կլիմայական ճգնաժամի լուծմանը – Իրինա Մկրտչյան, համայնքների կայուն զարգացման նորարարական լուծումներ (ISSD) ՀԿ
Համաժողովի ավարտին մասնակիցները մշակեցին համատեղ հայտարարության նախագիծը և գրավոր արձանագրեցին իրենց խոստումներն այն մասին, թե ինչպես կարող ենք առօրյա կյանքում մեր վարքագիծը փոխելով սեփական օրինակով ներազդեցություն ունենալ մեր դպրոցներում և համայնքներում: «Դը Գուդ Ինվեսթորզ» կազմակերպության աջակցությամբ, Բրիտանական միջազգային դպրոցի աշակերտ Դավիթ Խանոյանին և Դիլիջանի ավագ դպրոցի աշակերտ Սոֆի Նալբանդյանին շնորհվեց Քլայմիթ Յու-Թըրնում փորձնակ դառնալու հնարավորություն:
UWC Դիլիջանի ուսանող Էրդնի Մանգուտովը (Ռուսաստան) անդամակցում է Կլիմայի փոփոխության միջազգային շարժմանը (YOUNGO), որը կազմակերպում է երիտասարդների տեղական համաժողովները: Հենց էրդնին է նախաձեռնել UWC Դիլիջանը որպես Հայաստանի երիտասարդների տեղական համաժողովի անցկացման վայր դիմում հայտի ներկայացման գործընթացը: «Իրոք ոգևորիչ է, որ Հայաստանում ներկայացված են այսքան տարբեր երկրներ, և Հայաստանն էլ ներկայացված է տարբեր մարզերի մակարդակով: Հուսով եմ, որ համաժողովը կմոտիվացնի բոլորին քայլեր կատարել այս խիստ կարևոր ոլորտներում դրական փոփոխություններ առաջացնելու ուղղությամբ, և կդառնա ամենամյա միջոցառում: Կլիմայի փոփոխության վերաբերյալ իրազեկումը այն հիմքն է, որի վրա հնարավոր կլինի փոփոխել մեր վարքագիծը թե անհատների և թե հասարակության մակարդակում»:
