«Հայաստանի նկատմամբ բոլոր ագրեսիվ գործողություններն իրենց արժանապատիվ պատասխանը ստացել են։ Հայաստանի զինված ուժերը ցանկացած ագրեսիայի պատրաստ են դիմակայել ու պատասխան տալ։ Այդպես եղել է եւ այդպես է լինելու»,- այս մասին այսօր խորհրդարանում լրագրողների հետ ճեպազրույցում ասաց ԱԺ փոխնախագահ Հակոբ Արշակյանը։
«Առավոտի» հարցին, թե ՀՀ տարածք ներխուժած ադրբեջանական հրոսակախմբերը ինչո՞ւ հետ չեն շպրտվում ՀՀ տարածքից կամ չեն ոչնչացվում ու ձերբակալվում, Հակոբ Արշակյանը պատասխանեց. «Հիմա դուք ուզում եք, որ մենք գնանք խաղաղության օրակարգի՞ ուղղությամբ, թե՞ ուզում եք, որ գնանք պատերազմի ուղղությամբ»։ Հարցին՝ եթե օկուպացված են ՀՀ տարածքները, հնարավո՞ր է խաղաղություն ունենալ, ԱԺ փոխնախագահը պատասխանեց. «Ըստ իս՝ ցանկացած կոնֆլիկտային իրավիճակ հնարավոր է լուծել, եթե կողմերն ունեն բավարար պատրաստակամություն։ Եթե դուք ինձ հարցնում եք՝ արդյոք մեր թշնամին ունի՞ բավարար պատրաստակամություն, ես ասում եմ՝ քայլերը բավարար չեն եղել մինչեւ հիմա։ Եթե բավարար լինեին, ստորագրված կլիներ այդ փաստաթուղթը։ Եվ հույս եմ հայտնում, որ այդ քայլերը բավարար կլինեն առաջիկայում։ Մեր ընթացքը չի փոխվելու, մենք գնալու ենք այս ուղղությամբ»։
Ռոզա ՀՈՎՀԱՆՆԻՍՅԱՆ
