ԱԺ փոխնախագահ Հակոբ Արշակյանից լրագրողներն այսօր հետաքրքրվեցին, թե Հռոմի ստատուտի վավերացումից առաջ Հայաստանը Ռուսաստանին ի՞նչ պայմանագիր է առաջարկել, եւ ինչո՞ւ այդ պայմանագիրը չստորագրվեց։
Հակոբ Արշակյանն ասաց, որ բազմաթիվ երկրներ, այդ թվում՝ ԱՄՆ-ն, չեն վավերացրել ու չեն ստորագրել Հռոմի ստատուտը։ «Նրանք նախաձեռնել էին գործընթաց, օրինակ, ԱՄՆ-ն, որ երկկողմ ձեւաչափով ստորագրվում է միջպետական համաձայնագիր, որ իրենց վերաբերող հարցերում նրանք չեն օգտագործում այդ հարթակը, այսինքն՝ չեն համարում իրավազոր։ Նման մեխանիզմ գոյություն ունի, եւ հաշվի առնելով այն խնդիրը՝ կալանավորման օրդերը,
որը ՌԴ նախագահի մասով ի հայտ է եկել ՀՀ կողմից Հռոմի ստատուտը վավերացնելու գործընթացն սկսելուց հետո, ՀՀ արտգործնախարարության խողովակով Ռուսաստանին առաջարկ է եղել, որ երկկողմ այդ համաձայնագիրը, որը, օրինակ, ԱՄՆ հետ Հայաստանը կնքել է, կնքվի նաեւ Ռուսաստանի եւ Հայաստանի միջեւ։ Եվ մենք համարում ենք, որ դա նորմալ գործընթաց է»,- ասաց նա։
Ըստ Արշակյանի՝ դա ենթադրում էր, որ ՌԴ նախագահի վերաբերյալ այդ վճիռները իրավազորության ճանաչման խնդիր կունենան Ռուսաստանի եւ Հայաստանի կողմից, այսինքն՝ երկու երկրների ներքին հարաբերությունների վրա դա չի ազդի։ «Այսինքն՝ իրավական առումով մենք կարող ենք ունենալ երկկողմ համաձայնագիր, որը բացառում է Միջազգային դատարանի որոշումների կիրառումը երկու երկրներին վերաբերող հարցերում»,- ասաց Արշակյանը։ Ըստ նրա՝ դա երկու երկրների միջեւ միջպետական համաձայնագիր է կոչվում։
«Մենք դրան արձագանք չենք ստացել, բայց դեռ կա ժամանակ։ Եվ ես հույս ունեմ, որ պրոգրես կլինի այս ուղղությամբ։ Ես չեմ կարող բացատրել Ռուսաստանի դիրքորոշումը, կխնդրեմ իրենց ուղղել այդ հարցերը»,- հավելեց նա։
Կարդացեք նաև
Ռոզա ՀՈՎՀԱՆՆԻՍՅԱՆ
