Ազգային ժողովի մշտական հանձնաժողովների նիստում 2024 թվականի բյուջեի նախագծի քննարկման ժամանակ Հակակոռուպցիոն կոմիտեի նախագահ Սասուն Խաչատրյանն անդրադարձավ ապօրինի գույքի բռնագանձման գործերով իր ղեկավարած կառույցի կատարած աշխատանքին։
«Ես չեմ գնա դատախազության դաշտ, որովհետեւ ապօրինի գույքի բռնագանձումն ամբողջությամբ դատախազության դաշտում է։ Ես մեր թվերը կներկայացնեմ․ ավարտված գործերով եւ դատարան գնացած գործերով պատճառված գույքային վնասը կազմել է 13 մլրդ 783 մլն դրամ, որից ավարտված գործերով վերականգնվել է 178 մլն դրամ, եւ կալանք է դրվել շուրջ 13,3 մլդ դրամի գույքի վրա։ Այսինքն՝ պատճառված վնասի ողջ ծավալով արգելանք է դրվել գույքերի վրա, իսկ 178 մլն դրամը հենց կանխիկ գումարով բերել վերականգնել են։ Իսկ այս պահին մեր վարույթում գտնվող գործերով նման եղանակով՝ կանխիկ գումարով վերականգնվածը կազմել է 1 մլրդ 091 մլն դրամ»,- ասաց նա։
Սասուն Խաչատրյանը նշեց, որ վարույթում ներկայում գտնվող քրեական գործերով արգելանքի տակ գտնվող գույքերը մի քանի տասնյակ միլիարդ դրամների են հասնում՝ մի շարք քրեական գործերով։ «Կարծում եմ՝ մոտ ժամանակներս այդ գործերը կուղարկվեն դատարան եւ հույս ունեմ՝ մեղադրական դատավճիռների առկայության դեպքում կունենանք այդ վերականգնումները»,- հավելեց նա։
Ռոզա ՀՈՎՀԱՆՆԻՍՅԱՆ
