Թուրքիայի ԱԳ նախարար Հաքան Ֆիդանը հայտարարել է, որ Անկարան պատրաստ է դառնալ երաշխավոր Իսրայելի և Պաղեստինի միջև հակամարտության կարգավորման հարցում։
Թուրքիայի արտգործնախարարը նման հայտարարությամբ հանդես է եկել իրանցի գործընկերոջ՝ Հոսեյն Ամիր Աբդոլլահիանի հետ մամուլի ասուլիսի ժամանակ։ «Մենք պատրաստ ենք հանդես գալ որպես կարգավորման երաշխավոր․․․ Տարածաշրջանի բոլոր խաղացողներին և դերակատարներին կոչ ենք անում աջակցել կայուն խաղաղության ապահովման ջանքերին»,-ասել է նա։
Հաքան Ֆիդանը միևնույն ժամանակ քննադատել է Արևմուտքին՝ երկակի ստանդարտների համար։ «Չեն կարող լինել տարբեր ստանդարտներ Ուկրաինայի և Գազայի համար։ Իսրայելը և Արևմուտքը պետք է պատասխանատվություն վերցնեն Գազայում հակամարտության կարգավորման համար։ Եթե ցանկանում ենք արդար խաղաղություն, պետք է գործենք սկզբունքային և հավասարակշռված»,-հավելել է թուրք արտգործնախարարը։
Իրանի արտգործնախարարն իր հերթին հայտարարել է, որ Մերձավոր Արևելքում հակամարտության շարունակության պատասխանատուն կլինի Միացյալ Նահանգները և իսրայելական վարչակարգը։ «Եթե Գազայի հատվածում ցեղասպանությունը չդադարի, տարածաշրջանը կմոտենա վճռական որոշում կայացնելու պահին»,-հայտարարել է Աբդոլլահիանը՝ առանց մանրամասնելու, թե ինչ որոշման մասին է խոսքը։
