Չեչնիայի ղեկավար Ռամզան Կադիրովը ուժայիններին հրահանգել է ծայրահեղ կոշտ միջոցներ կիրառել անկարգությունների հնարավոր մասնակիցների դեմ, այդ թվում հրազենի կիրառմամբ,: Կադիրովը նման հայտարարությամբ հանդես է եկել Դաղստանում անկարգությունների ֆոնին:
«Եթե մեզ մոտ գեթ մեկ հոգի մասնակցի չարտոնված անկարգությունների, կալանավորեք և բանտարկեք կամ երեք նախազգուշական կրակոց արձակեք օդ, իսկ դրանից հետո, եթե մարդը չի կատարում օրենքի պահանջը, չորրորդ կրակոցն արձակեք ճակատին»,- ասել է նա կառավարության նիստում։
Միևնույն ժամանակ Կադիրովն ընդգծել է, որ խոսքն իր հրամանի մասին է: Մախաչկալայում հակասեմական անկարգություններից հետո Չեչնիայի Հանրապետության ղեկավարը հայտարարել էր տարածաշրջանում զանգվածային բողոքի ցույցերը կանխելու և «նման սադրանքը» դադարեցնելու անհրաժեշտության մասին։
Հիշեցնենք, որ հոկտեմբերի 29-ին Դաղստանում տեղի են ունեցել հակասեմական անկարգություններ: Մասնավորապես մի խումբ մարդիկ Խասավյուրտ քաղաքում հավաքվել են Ֆլամինգո հյուրանոցի մոտ՝ տեղեկությունների պատճառով, թե այստեղ իբրև թե տեղակայվել են փախստականներ Իսրայելից: Հավաքվածներն ապացույցներ են պահանջել, որ հյուրանոցում հրեաներ չկան, քարեր են նետել շենքի ուղղությամբ՝ բղավելով «Ալլահ աքբար»:
Կարդացեք նաև
Նույն օրը երեկոյան մի քանի հարյուր տեղացի ներխուժել է Մախաչկալայի օդանավակայան՝ Թել-Ավիվիվ չվերթի ժամանումից առաջ: Նրանք ներխուժել են օդանավակայան, հակահրեական կարգախոսներ բղավելով՝ փնտրել հրեաների: Անկարգությունների մասնակիցները կոտրել են դռներ, ջարդել ավտոբուսներ, արգելափակել ավտոմեքենաների ելքը, բռնի կերպով ստուգել են այնտեղ գտնվող մարդկանց անձնագրերը: ՆԳՆ-ի տվյալներով՝ ձերբակալվել է 83 մարդ, հարուցվել է քրեական գործ՝ զանգվածային անկարգություններ հոդվածով: ՌԴ նախագահ Վլադիմիր Պուտինը, անդրադառնալով Մախաչկալայի դեպքերին, հայտարարել է, որ տեղի ունեցածի հետևում կանգնած է Կիևը, ինչպես նաև արևմտյան կառույցները: Սպիտակ տունը «անհեթեթ» է որակել Պուտինի մեղադրանքը:
