«Երբ որ խաղաղության պայմանագիր կնքվի, որի դրույթներից մեկը կամ դրան հաջորդած գործընթացներից մեկը կլինի դեմարկացիա-դելիմիտացիա երեւույթը, անկլավների հարցերը կդիտարկվեն այդ համատեքստում։ Կքննարկվի, թե ինչ իրավական հիմքեր կան, որովհետեւ անկլավի կամ որեւէ տարածքի համար նույնպես պետք է իրավական հիմքեր լինեն, թե մենք ինչ ունենք իրենց մոտ, իրենք ինչ ունեն մեզ մոտ»,- այսօր Ազգային ժողովում լրագրողների հետ ճեպազրույցում ասաց ՏԿԵ նախարար Գնել Սանոսյանը։
Նշենք, որ Նիկոլ Փաշինյանն իր ասուլիսներից մեկում, պատասխանելով հարցին, թե արդյոք Ադրբեջանի 86․6 հազար քկմ տարածքի մեջ, որը ՀՀ իշխանությունները հայտարարել են, որ ճանաչում են, մտնում են նաեւ այսպես կոչված անկլավները, պատասխանել էր․ «Այո, որովհետեւ 29 800 քկմ մեջ Արծվաշենը նույնպես մտնում է։ Իսկ 86․6 հազար քկմ մեջ մտնում են նաեւ անկլավները»։
Գնել Սանոսյանն ասաց, որ առաջին հերթին հենց Արծվաշենի հարցը պետք է քննարկել։ Դիտարկմանը, որ Արծվաշենը չունի ՀՀ համար այն ռազմավարական նշանակությունը, ինչ ունեն մյուս բնակավայրերը, ՏԿԵ նախարարը պատասխանեց․ «Ես էլ ասում եմ՝ այդ գործընթացները կարող են պարզվել ու լուծումներ ու որոշումներ լինեն համապատասխան աշխատանքային խմբերի աշխատանքից հետո»։ Հարցին, թե այսինքն՝ կառավարությունն այսօր ռիսկերը չի՞ գնահատում, նա նման պատասխան տվեց․ «Մենք տարբեր ռիսկեր գնահատում ենք, քննարկում ենք, որոշակի աշխատանքներ ենք անում այդ ուղղությամբ, բայց ամեն ինչ չէ, որ պետք է խոսել ու բարձրաձայնել»։
Ռոզա ՀՈՎՀԱՆՆԻՍՅԱՆ
