ՔՊ խմբակցության պատգամավոր Վիլեն Գաբրիելյանը Ազգային ժողովի մշտական հանձնաժողովների նիստում 2024 թվականի բյուջեի նախագծի քննարկման ժամանակ անդրադարձավ պարգեւատրված զենքի հարցին։ «Ուզում եմ ֆիքսեք, որ «Զենքի շրջանառության կարգավորման մասին» նոր օրենքով պարգեւատրված զենքի մասով մենք վերահսկողության տեսանկյունից որոշակի հնարավորություններ ենք տվել ՆԳ նախարարությանը։ Եվ այդ առումով խնդրում եմ ձեզ ավելի հետեւողական լինեք այդ պարգեւատրումների հարցով, Արցախի Հանրապետության նախագահի կողմից պարգեւատրումների մասով՝ անկախ նրանից, այդ մարդը հանդիսացել է Արցախի Հանրապետության, թե՞ Հայաստանի Հանրապետության քաղաքացի։ Անկախ իր ով լինելուց եւ կարգավիճակից՝ մենք շատ լրջագույն պետք է ուսումնասիրենք թե՛ իրավական հիմքերը, թե՛ պատճառները՝ ինչի՞ համար են այդ մարդիկ պարգեւատրվել»,- ասաց Վիլեն Գաբրիելյանը։
ՔՊ խմբակցության պատգամավոր Անդրանիկ Քոչարյանն ասաց, որ հասկանում է Վիլեն Գաբրեիլյանի մտահոգությունը։ «Եղել է ժամանակաշրջան, երբ մեր վարչապետներից մեկը 630 զենքի թույլտվություն է տվել շատ անհասկանալի մարդկանց։ Այսինքն՝ պետք է այդ դաշտը բերենք այնպիսի վիճակի, որ արժանի մարդն ունենա, այդ մարդն իմանա՝ զենքն ինչ բան է, եւ ոչ թե զենք լինի վրան, եւ սկսի վախեցնել ընտանիքի անդմաներին, հարեւաններին, փողոցում քայլող մարդկանց»,- ասաց Քոչարյանը։
Ռոզա ՀՈՎՀԱՆՆԻՍՅԱՆ
