«Շատ ուրախ եմ այսօր այստեղ գտնվելու համար՝ իմ պատվիրականության անդամներով: Պատվիրակության կազմում կան նաեւ պառլամենտի անդամներ, այստեղ է նաեւ Ժորժ Քեփենեկյանը, որ նախկինում ստանձնել էր Լիոնի քաղաքապետի պաշտոնը: Լիոնը շատ հոգեհարազատ քաղաք է ինձ համար, որտեղ ես տեղափոխվել եմ Լիբանանից եւ ապրել եմ երկար տարիներ»,- ասուլիսում նշեց Հայաստան այցելած Ֆրանսիայի մշակույթի նախարար Ռիմա Աբդուլ Մալակը:
«Երբ խոսում ենք հայ-ֆրանսիական հարաբերությունների մասին, իսկույն մտածում ենք մշակույթի, գործընկերային ոլորտների եւ այն ուժի մասին, որն առկա է Ֆրանսիայի եւ Հայաստանի հարաբերություններում: Այս դժվարին պահին հույժ կարեւոր էր ասել, որ Ֆրանսիան ձեր կողքին է: Ձեր կողքին է ոչ միայն դիվանագիտական, այլ նաեւ մշակութային եւ այլ ոլորտների սատարման առումով: Ֆրանսիան ունի բազմաթիվ մշակութային համագործակցային ծրագրեր տարբեր երկրների հետ, սակայն այն համագործակցությունը մշակույթի եւ այլ ոլորտներում, որ առհասարակ Ֆրանսիան ունի Հայաստանի հետ, ուրույն տեղ են զբաղեցնում Ֆրանսիայի քաղաքականությունում, քանի որ այս պարագայում կա հոգի, կա հույզ, կա մեծ ուժ»,-ասաց Ռիմա Աբդուլ Մալակը:
«Այսօրվա իմ այցը տեղի է ունենում արտգործնախարար Կատրին Կոլոնայի այցից հետո, որը Հայաստան էր ժամանել մի քանի շաբաթ առաջ եւ, որը նույնպես եւս մեկ անգամ հաստատել է Ֆրանսիայի սատարումը եւ օժանդակությունը Հայաստանին՝ այս դժվարին պահին: Արտգործնախարար տիկին Կոլոնան հայտարարեց, որ Ֆրանսիան 7 մլն եվրո գումարի տեսքով աջակցություն կցուցաբերի Հայաստանին, որպեսզի այդ գումարով Հայաստանը կարողանա հոգալ այն բոլոր կարիքները, որոնք կապված են Լեռնային Ղարաբաղից բռնի ուժով տեղահանված ազգաբնակչության հետ: Ես էլ այստեղ եմ, որ վերահաստատեմ, որ Ֆրանսիան սատար է կանգնում Հայաստանին նաեւ մշակութային ոլորտում:
ԵՄ-ն եւս շատ մեծ աջակցություն է ցուցաբերում, որովհետեւ մեծաթիվ դիտորդների է ուղարկել, որոնք այսօր դիտորդական առաքելություն են իրականացնում հայ-ադրբեջանական սահմանին: Իմ ղեկավարած պատվիրակության մեջ կա ներկայացուցիչ, որը զբաղվում է նման տիպի հարցերով»,-հավելեց Ֆրանսիայի մշակույթի նախարարը: Նշեց, որ վերջերս Փարիզում ընդունել է ԿԳՄՍ նախարար Ժաննա Անդրեասյանին, որի հետ միասին ոչ միայն ամրապնդել են եղած ծրագրերը, այլեւ նախանշել համագործակցության նոր եզրեր:
Կարդացեք նաև
Գոհար ՀԱԿՈԲՅԱՆ
