Աշխարհահռչակ օպերային երգիչ, մեքսիկացի տենոր Ռամոն Վարգասը Երեւանյան 15-րդ միջազգային երաժշտական փառատոնի շրջանակում հոկտեմբերի 25-ին հանդես եկավ «Արամ Խաչատրյան» համերգասրահում ՝ Հայաստանի ազգային ֆիլհարմոնիկ նվագախմբի (ՀԱՖՆ) ընկերակցությամբ, որը ղեկավարում էր ՀԱՖՆ գլխավոր դիրիժոր եւ գեղարվեստական ղեկավար Էդուարդ Թոփչյանը։
Ծրագրում արիաներ եւ նախերգանքներ էին հանրահայտ տենորի երկացանկից՝ Մոցարտ, Դոնիցետտի, Ռոսսինի, Վերդի, Բիզե, Չայկովսկի: Ամեն ելույթ Վարգասի համար կարծես հերթական աղոթք լիներ առ Աստված, քանի որ իսկապես աստվածահաճո էր այն, ինչ նա արարում էր բեմում:
Համերգն ավարտվել էր, սակայն ունկնդիրը բաց չէր թողնում Ռամոն Վարգասին, նա երեք անգամ «բիս» երգեց, վերջինը՝ անչափ զգացմունքային ու գեղեցիկ «Բեսամե մուչոն» էր:
Կարդացեք նաև
Դահլիճը պայթում էր ծափահարություններից: Վարգասն ասաց, որ առաջին անգամ է Հայաստանում, մեծ պատիվ եւ հաճույք է այստեղ ելույթ ունենալը, որտեղ ամեն ինչ հիասքանչ է՝ երաժշտությունը, մշակույթը, եղանակը, սնունդը, մարդիկ. «Երաժշտությունը միավորում եւ ներդաշնակություն է ստեղծում մարդկանց միջեւ»:
Ի դեպ, համերգի ավարտից հետո Ռամոն Վարգասի ձայնը հնչում էր նաեւ Արամ Խաչատրյան համերգասրահի ճեմասրահում, ունկնդիրը համառորեն չէր ուզում հեռանալ:
Ռամոն Վարգասը 1992թ.-ին Մետրոպոլիտեն օպերայում Լուչանո Պավարոտտիին «Լյուչիա դի Լամերմուր» օպերայում փոխարինելուց հետո դարձել է աշխարհի գլխավոր թատրոնների ցանկալի հյուրը: Այժմ նա մշտապես ելույթներ է ունենում Բուենոս Այրեսի Կոլոն թատրոնում, Լոնդոնի Թագավորական թատրոնում, Լա Սկալայում, Մետրոպոլիտենում, Մադրիդի թագավորական թատրոնում, Փարիզի Օպերա Բաստիլում, Սան Ֆրանցիսկո օպերայում, Վիեննայի պետական օպերային թատրոնում, Արենա դի Վերոնայում եւ այլուր: Վարգասը բազմաթիվ մրցանակների է արժանացել, այդ թվում՝ 2005-ին Պուչչինիի մրցանակի Puccini Foundatzione-ի կողմից, 2018-ին՝ «Opera News Award» մրցանակի, իսկ 2020թ Մեքսիկայում արժանացել է Ortiz Tirado Award-ին:
Իսկ մաեստրո Թոփչյանի ղեկավարած Հայաստանի ազգային ֆիլհարմոնիկ նվագախմբին ներկայացնելու հարկ չկա՝ այն մեր երկրի այցեքարտերից մեկն է աշխարհի տարբեր անկյուններում: Ի թիվս այլ անվանի երաժիշտների, Ռամոն Վարգասը եւս Ֆիլհարմոնիկ նվագախումբը որակել է բացառիկ, իսկ Էդուարդ Թոփչյանին՝ հրաշալի դիրիժոր:
Գոհար ՀԱԿՈԲՅԱՆ
