Հանդիպեցինք Հայաստանում Շվեդիայի Թագավորության դեսպան Ն.Գ. պարոն Պատրիկ Սվենսոնին և զարգացման համագործակցության հարցերով ղեկավար, փոխդեսպան Կլաս Վալդենստրյոմին: Շարունակում ենք արցախցի իմ գործընկերներ Լուսինե Ղարախանյանի, Ազատուհի Սիմոնյանի հետ միջազգային իմ գործընկերների հետ հանդիպումների շարքը, որի ընթացքում հիմնականում քննարկում ենք հարցերի երկու շրջանակ.
✔️արցախահայերի հումանիտար խնդիրներ, ✔️Արցախի Հանրապետությանն ու ժողովրդի ապագային առնչվող հարցեր: Պարոն դեսպանին ներկայացրինք իրավիճակն Արցախում, որտեղ հազիվ 4 տասնյակ քաղաքացիներ են ապրում, ովքեր հիմնականում հիվանդներ են կամ ծերեր և Հայաստան գալու հնարավորություն չունեն:
🔹Հանդիպմանը բարձրացրինք արցախցիների ունեցվածքի և պատմամշակութային ժառանգության հարցերը՝ դեսպանից խնդրելով աջակցել՝ պահպանելու կրոնական կոթողները, համաշխարհային ժառանգության մասնիկները և հայերի տներն ու գերեզմանները:
🔹Ընդգծեցի հայ գերիների, Արցախի ռազմաքաղաքական ղեկավարության պատանդառության հարցի լուծման հրատապությունը՝ խնդրելով ջանքեր գործադրել նրանց վերադարձի ուղղությամբ:
Կարդացեք նաև
🔸Ինչ վերաբերում է Արցախի ապագային, նշեցի, որ արցախցիների ինքնորոշման իրավունքը պետք է ճանաչվի Կոսովոյի անկախության օրինակով, որը հնարավորություն կտա մեր հայրենակիցներին վերադառնալ իրենց հայրենիք՝ միջազգային ամուր երաշխիքների պայմաններում:
🔸Քննարկեցինք նաև արցախցիների հումանիտար խնդիրները, դրանց երկարաժամկետ լուծման ուղիները: Արցախի Հանրապետության կրթության, գիտության, մշակույթի և սպորտի նախկին նախարար, Արցախի նախագահի՝ կրթության հարցերով խորհրդական Լուսինե Ղարախանյանը, Արցախի Հանրապետության նախագահի՝ սփյուռքի հարցերով խորհրդական, «ԳՈՅ» մարդասիրական հիմնադրամի խորհրդի նախագահ Ազատուհի Սիմոնյանն ու ես շնորհակալություն հայտնեցինք Շվեդիային՝ տարբեր ծրագրերի շրջանակներում հումանիտար աջակցության համար, որոնք Շվեդիայի Թագավորությունը տրամադրել է Հայաստանի Հանրապետությանը և արցախահայերին՝ իր գործընկերների և ԵՄ Քաղաքացիական պաշտպանության մեխանիզմի միջոցով։
🇦🇲🇸🇪«Շվեդիան սատարում է Հայաստանի ինքնիշխանությանը և տարածքային ամբողջականությանը, ինչպես նաև Հայաստանի ժողովրդավարական ձգտումներին և բարեփոխումներին։ Հայաստանին առնչվող հարցերը Եվրոպական Միության ուշադրության առանցքում են»,- իր խոսքում նշեց Ն.Գ. պարոն Սվենսոնը:
Թագուհի ԹՈՎՄԱՍՅԱՆ
ԱԺ մարդու իրավունքների պաշտպանության և հանրային հարցերի մշտական հանձնաժողովի՝ ապօրինաբար լիազորությունները դադարեցված նախագահ, անկուսակցական պատգամավոր
