«Ես ամիսներ առաջ մի անգամ եկա ձեր տաղավար, ասացի, որ զարհուրելի է, երբ Վերնիսաժում տարայով վաճառվում է Շուշիի հողը: Ու այն ժամանակ ասացինք, որ եթե այս արհավիրքը չկանգնեցվի, Նիկոլ Փաշինյանը իշխանությունից չհեռացվի, Վերնիսաժում եւ բոլոր «տոչկաներում» վաճառելու են արդեն Ստեփանակերտից, Մարտակերտից, Ամարասից, Գանձասարից բերված հող: Երբ մի 9 ամիս առաջ ասում էինք այս բառերը, չէինք կարող պատկերացնել, որ Ստեփանակերտը եւս դառնալու է հուշ, Գանձասարը լավագույն դեպքում՝ սառնարանի ճտիկ կամ Վերնիսաժում վաճառելու են Գանձասարի եկեղեցու մոտից բերած մի չռթլիկ քարի կտոր, ինչպես 9 ամիս առաջ վաճառում էին Շուշիից բերված հողը, որովհետեւ մենք մեր իրական հայրենիքը պաշպանել չգիտենք: Ինչպես Վանոն էր ասում՝ իրականը թողած, սիրել ենք պատմական հայրենիքը»,-«Հայելի» ակումբում ասաց ԱԺ նախկին պատգամավոր, «Անվտանգություն եւ ժողովրդավարություն» իրավապաշտպան հասարակական կազմակերպության նախագահ Նաիրա Զոհրաբյանը:
«Ադրբեջանի կողմից բռնազավթված հայկական Արցախում պղծվել են 100-ավոր եկեղեցիներ, քանդվել են խաչքարեր ու սրբավայրեր, պղծվել է Ղազանչեցոցը, որը վերածվել է մզկիթի, Ալիեւի կինն անձամբ էր հրահրում այդ ամենը: Տեսանյութերը տարածվեցին, թե ինչպիսի արագությամբ են մաքրել հայկական սրբավայրերի վրայից հայկականության ցանկացած հետք: Եվրոպական բոլոր մեծ քաղաքների օդանավակայաններում այլեւս վաճառվում են հաստափոր գրքեր՝ Արցախի մշակութային ժառանգության ոչ թե հայկական, այլ ալբանական լինելու մասին: Եվս մի քանի ամիս, եւ Արցախի մշակութային ժառանգությունից այլեւս չի մնալու ոչինչ, իսկ Նիկոլ Փաշինյանին երեկ Հռոմի պապը պարգեւատրում է Պիոս 9-րդի Ասպետական մեծ խաչով:
Հիմա հարց է առաջանում՝ ինչի՞ համար է Հռոմի պապը Հայաստանի վարչապետին պարգեւատրել Վատիկանի ամենաբարձր պարգեւներից մեկով, պարգեւատրել է Արցախի եկեղեցիները հանձնելու համար, Նիկոլը պարգեւատրվել է Պիոս 9-րդի Ասպետական մեծ խաչով Արցախի սրբատեղիները Դադիվանքը, Ամարասը, Գանձասարը, Ղազանչեցոցը, Կանաչ ժամը հանձնելու համար, պարգեւատրվել է հարյուրավոր հայկական խաչքարեր պղծելու համար, Արցախի մշակութային ժառանգության հայկականության հետքերը ջնջելու համար»,-ասաց Նաիրա Զոհրաբյանը: Հավելեց, որ Նոբելյան հանձնաժողովը եւս, ըստ որոշ տեղեկությունների, պատրաստվում է պարգեւատրել Փաշինյանին եւ Ալիեւին:
Կարդացեք նաև
Նա դիմեց Ամենայն Հայոց կաթողիկոսին՝ տարակուսանք հայտնելով, որ չի բարձրացվում Փաշինյանի պարգեւատրման հարցը. «Վեհափառ տեր, բացի եկեղեցապատկան տարածքներում «մետլախ ու պլիտա» խփելու հույժ կարեւոր գործընթացը վերահսկելուց, ինչո՞վ եք զբաղված: Չե՞ք ուզում մի հատ առարկություն ներկայացնել Հռոմի պապին ու հարցնել՝ էդ ի՞նչ եք հանձնել, չե՞ք ուզում եկեղեցական ժողով հրավիրել, պարգեւը հանձնող կարդինալին հրավիրել ու հարցնել՝ ինչի համար է Վատիկանի բարձրագույն խաչերից մեկը հանձնում Նիկոլ Փաշինյանին»:
Գոհար ՀԱԿՈԲՅԱՆ
