Երեւան քաղաքի առաջին ատյանի ընդհանուր իրավասության դատարանի «Կենտրոն» նստավայրում դատարանի դահլիճում հանկարծամահ եղած պրոդյուսեր Արմեն Գրիգորյանի գործով այսօրվա դատական նիստում պաշտպանության կողմը միջնորդություն ներկայացրեց, որպեսզի լեզվաբան փորձագետը հրավիրվի դատական նիստին եւ հարցաքննվի, ինչին հանրային մեղադրողը առարկեց: Սակայն դատարանը բավարարեց պաշտպանության կողմի միջնորդությունը՝ որոշելով նոյեմբերի 3-ին, ժամը 09:30-ին կայանալիք հաջորդ դատական նիստին հրավիրել լեզվաբան փորձագետին:
Փաստաբան Արմեն Մաշինյանը Aravot.am-ին ասաց, որ պաշտպանության կողմն ի սկզբանե զրկված է եղել պաշտպանության համար նպաստավոր հարցադրումներն առաջ քաշելու հնարավորությունից: «Ավելին, նախաքննության ընթացքում պաշտպանության կողմից միջնորդություն է եղել լրացուցիչ փորձաքննության արդյունքում փորձագետին հարցաքննելու, ինչը մերժվել է: Հետեւաբար, սա մեզ համար շատ կարեւոր է»,- ասաց նա՝ հավելելով, որ լեզվաբան փորձագետը կարող է հիմնավորել լեզվաբանական մասնագիտական եզրակացությունը եւ հարցադրումներին պատասխանել:
Այնուհետեւ, դատական նիստում բարձրացվեց ապացույցների թույլատրելիության խնդիրը, որը քննարկվեց, կայացվեցին որոշումներ, որոնց արդյունքում ըստ փաստաբանի, իրենք մոտեցել են արդեն եզրափակիչ ելույթների փուլին, որի համար էլ պայմանական օր եւ ժամ նշանակվեց նոյեմբերի 28-ը, ժամը 13:00-ն:
Արմեն Գրիգորյանը, հիշեցնենք, մահացել է 2022 թ․ հուլիսի 15-ին՝ իր իսկ գործով առաջին դատական նիստի ժամանակ։ Թեեւ Քրեական դատավարության օրենսգիրքը անձի մահը դասում է քրեական հետապնդումը բացառող հանգամանքների շարքին, սակայն սահմանում է, որ վարույթը կարող է շարունակվել, եթե մահացածի օրինական ներկայացուցիչը առարկում է կարճման դեմ՝ այն հիմքով, որ վերջինս չի կատարել իրեն վերագրվող հանցանքը։
Կարդացեք նաև
Արմեն Գրիգորյանին վերագրվում է հրապարակայնորեն ազգային թշնամանք հարուցելուն, ազգային արժանապատվությունը նվաստացնելուն ուղղված գործողություններ կատարելը, որի համար հիմք է հանդիսացել հարցազրույցներից մեկի ժամանակ Շիրակի եւ Արարատյան դաշտավայրի բնակչությանը «թուրք» անվանելը։
Աշոտ ՀԱԿՈԲՅԱՆ
