«Ադրբեջանը բազմիցս հայտարարել է, որ ՀՀ տարածքային ամբողջականության հետ խնդիր չունի եւ սա փաստ է: Ինչ-որ մի հարթակում նշվում է 29.800 քկմ-ն, ինչ-որ մի հարթակում չի նշվում: Ի՞նչ է նշանակում՝ մանեւրում է: Դուք բոլորդ հետեւել եք, եղել է հայտարարություն թե՛ Սյունիքի մասով, որ չկա որեւէ տարածքային պահանջ ՀՀ-ից, ես հիմք չեմ տեսնում մանեւրելու համար: Բանակցային պրոցեսը, այո, կնճռոտ է, հարցեր առաջացնող է, բայց ես ձեզ եւ մեր հանրությանը վստահեցնում եմ, որ ՀՀ դիրքերը բանակցային գործընթացում այսօր նորմալ են: Մենք այս փլուզվող աշխարհակարգում կարողացել ենք ապահովել մեր երկրի անվտանգությունը, եւ ես սա համարում եմ մեծ ձեռքբերում, որ այս լարված իրավիճակում ՀՀ սահմանները հանգիստ են եւ բանակցային պրոցեսում լիարժեք ներգրավված լինելով՝ ներկայացնում ենք ՀՀ շահը»,- այսօր ԱԺ-ում լրագրողների հետ զրույցում ասաց ՔՊ խմբակցության պատգամավոր Վաղարշակ Հակոբյանը՝ մատնանշելով Գրանադայի հանդիպման «հաջողությունը»:
Նրա խոսքով՝ ՀՀ տարածքային ամբողջականությունը ոչ ոք չի վիճարկում, ոչ մի գերտերություն. «Մենք պետք է հասնենք նրան, որ հստակ թվերով, սահմաններով, ամեն մի նրբությունը հաշվի առնելով՝ ֆիքսվի այդ ամենը»:
Ըստ Հակոբյանի, այս կամ այն հարթակում հանդիպումները չեղարկելը ունի քաղաքական ու ոչ քաղաքական բացատրություն, որը կտա ԱԳՆ-ն: Խոսելով այսպես կոչված անկլավների մասին՝ նա ասաց. «Ոչ մի բան ՀՀ քաղաքացու թիկունքում չի լինելու, մենք գնում ենք խաղաղության: Սա չի նշանակում, որ որեւէ մեկը պետք է ՀՀ քաղաքացու շահը, ՀՀ պետական շահը ստորադասի այլ ձեւակերպումներին, բացառված բան է: Դուք խոսում եք ինչ-որ գյուղերի մասին, բայց ես օրինակ վերջին ժամանակահատվածում չեմ լսել նման խոսակցություն: Բանակցային պրոցեսում բազմաթիվ հարցեր պետք է քննարկվեն, բայց դա չի նշանակում միակողմանի զիջողական քաղաքականություն, այդպիսի բան չկա»:
Կարդացեք նաև
Հռիփսիմե ՋԵԲԵՋՅԱՆ
