Օրերս Լոնդոնի Լորդերի Պալատի հարեւանությամբ գտնվող Սուրբ Ջոն Սմիթ Սքուեր համերգասրահում կայացավ գալա համերգ՝ նվիրված աշխարհահռչակ հայ կոմպոզիտոր Արամ Խաչատրյանի ծննդյան 120-ամյակին։ Համերգի կազմակերպիչն էր բրիտանահայկական «Քլինգեն» երգչախումբը եւ մշակութային ասոցիացիան՝ Միացյալ Թագավորությունում Հայաստանի դեսպանության եւ Միացյալ Թագավորության Հայկական Համայնքային Խորհրդի հովանու ներքո: Ներկա էր 400-ից ավելի հանդիսական, երեկոն վարում էր անվանի դերասանուհի Ջոանա Զորյանը։
ՄԹ-ում ՀՀ արտակարգ եւ լիազոր դեսպան Վարուժան Ներսիսյանը իր ելույթում ներկայացրեց Արամ Խաչատրյանի կյանքն ու միջազգային ձեռքբերումները։ Իր գոհունակությունը հայտնեց «Քլինգեն» երգչախմբին, մշակութային ասոցիացիային եւ գեղարվեստական ղեկավար Սիփան Օլահին՝ համերգի նախաձեռնության համար։
Համերգի ընթացքում հնչեց «Խաչատրիանա» սյուիտի բրիտանական պրեմիերան՝ «Գայանե», «Դիմակահանդես» եւ «Սպարտակ» բալետներից հատվածների պոպուրի, այնուհետեւ «Լեզգինկան», որը կատարեց Լոնդոնի Քլինգեն կամերային նվագախումբը՝ դիրիժոր Սիփան Օլահի ղեկավարությամբ:
Համերգի առաջին բաժինը եզրափակվեց Խաչատրյանի «Գարուն Երեւան» երգով, որը կատարեց անվանի տենոր Սիփան Օլահը՝ նվագախմբի հետ։
Կարդացեք նաև
Նշենք, որ նվագախմբային ստեղծագործությունների գործիքային փոխադրումները կատարել էր մաեստրո Սիփան Օլահն այս համերգի համար։
Միջոցառման երկրորդ հատվածում հնչեցին Խաչատրյանի հանճարեղ գործիքային եւ վոկալ ստեղծագործությունները՝ Անի Բատիկյանի՝ ջութակ, Պոլինա Շարաֆյանի՝ ջութակ, Յուլիա Չապլինայի՝ դաշնամուր, Մարիա Փալազյանի՝ դաշնամուր, Ջեք Հակոբ Մուրադյանի՝ հոբոյ, Հայարփի Եղիկյանի՝ սոպրանո, Սիփան Օլահի՝ տենոր, կատարմամբ։
Խաչատրյանի երկու երգերի «Ուռենու Երգ» եւ «Կենաց Երգ» երգչախմբային մշակումները կատարեց «Քլինգեն» երգչախումբը՝ Սիփան Օլահի ղեկավարությամբ։
Համերգի ավարտին դեսպան Ներսիսյանը փոխանցեց ՀՀ ԿԳՄՍՆ պատվոգիրը՝ հասցեագրված Սիփան Օլահին՝ արտերկրում հայ մշակույթի տարածման գործում ունեցած նշանակալի ավանդի համար։
Համերգի ընդմիջմանը ՄԹ-ում Հայկական Համայնքային Խորհրդի կողմից տեղադրված էր նվիրատվությունների արկղ՝ բռնի տեղահանված արցախահայությանը օգնելու նպատակով։
«Առավոտ» օրաթերթ
24.10.2023
