Շիրակի մարզի Արթիկ համայնքի բնակիչներն այսուհետ սոցիալական ծառայություններից կօգտվեն Միասնական սոցիալական ծառայության նոր տարածքային կենտրոնում։
Այսօր կայացել է կենտրոնի պաշտոնական բացման արարողությունը, որին մասնակցել են Աշխատանքի և սոցիալական հարցերի նախարար Նարեկ Մկրտչյանը, Շիրակի մարզպետ Մուշեղ Մուրադյանը, Արթիկ համայնքի ղեկավար Անան Ոսկանյանը, ՄՍԾ պետ Էդուարդ Պետրոսյանը և այլ պաշտոնատար անձինք:
Ներկաները շրջել են կենտրոնում, ծանոթացել իրականացված աշխատանքներին և սոցիալական ծառայությունների տրամադրման հնարավորություններին։ Վերջիններս նշել են, որ նոր տարածքային կենտրոնի հիմնմամբ՝ աշխատանքի և սոցիալական պաշտպանության ոլորտի ամենօրյա աշխատանքները կդառնան առավել հասցեական ու համակարգված։
Կենտրոնի հիմնումը, որի համար ՀՀ Կառավարության և Համաշխարհային բանկի համագործակցությամբ հատկացվել է շուրջ 179 մլն դրամ, բնակիչներին հնարավորություն կտա մեկ պատուհանի սկզբունքով օգտվել զբաղվածության, սոցիալական ապահովության, անձի ֆունկցիոնալության գնահատման և սոցիալական աջակցության ոլորտների ծառայություններից։
Կարդացեք նաև
Միասնական սոցիալական ծառայության Արթիկի տարածքային կենտրոնի հիմնման աշխատանքներն իրականացվել են Համաշխարհային բանկի կողմից ֆինանսավորվող Սոցիալական պաշտպանության վարչարարության երկրորդ ծրագրի (ՍՊՎԾ 2) շրջանակում։
ՀՀ ԱՍՀՆ ՏԵՂԵԿԱՏՎՈՒԹՅԱՆ ԵՎ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԲԱԺԻՆ
