ԱԺ-ում առողջապահության նախարար Անահիտ Ավանեսյանը ներկայացրեց «Բնակչության բժշկական օգնության եւ սպասարկման մասին օրենքում փոփոխություններ եւ լրացումներ կատարելու մասին նախագիծը, որով նախատեսվում է մասնագիտական անհատական լիցենզիաներ տրամադրել:
Նա հիշեցրեց, որ 2023-ի հունվարի 1-ից ներդրվել է բուժաշխատողների հավաստագրման գործընթացը ու արդեն կա մոտ 35 հազար հավաստագրված բուժաշխատող: Ավանեսյանի խոսքով՝ նախագծի ընդունման արդյունքում հնարավորություն կունենան բժշկական սխալների կամ էթիկական նորմերի խախտման պարագայում վերահսկողություն ունենալ բուժաշխատողների նկատմամբ:
Օրենքը նախատեսում է անհատական լիցենզիայի երկու տեսակ՝ ժամանակավոր եւ ամբողջական: Լիցենզավորման համար ժամկետներ են սահմանվում՝ մինչեւ 2025-ի հունվարի 1-ը:
Առողջապահության հարցերի հանձնաժողովի անդամ Հռիփսիմե Հունանյանը, որը հարակից զեկուցող էր, ասաց, որ եթե հավաստագրման գործընթացն անցնելով՝ տեսական գիտելիքներ են ձեռք բերում, ապա լիցենզավորմամբ պետք է բուժաշխատողներն ապացուցեն, որ կարող են այդ տեսական գիտելիքները գործնականում կիրառել. «Շատ կարեւոր է լիցենզավորման գործընթացը, որովհետեւ կարեւոր է գործնականում ճիշտ կարողանալ աշխատել, չվնասել պացիենտի առողջությունը»:
Կարդացեք նաև
«Հայաստան» խմբակցության պատգամավոր Արմենուհի Կյուրեղյանը կասկածներ ուներ՝ ո՞վ է գնահատելու, թե ո՞ր մասնագետն է լավը, որին պետք է տալ լիցենզիա, որին՝ ոչ:
Հռիփսիմե ՋԵԲԵՋՅԱՆ
