ԱԺ «Հայաստան» խմբակցության պատգամավոր Արթուր Խաչատրյանը խորհրդարանում լրագրողների հետ ճեպազրույցում անդրադարձավ ռուսական առաջին ալիքով հեռարձակված հաղորդմանը, որի ժամանակ Նիկոլ Փաշինյանի հասցեին քննադատություններ են հնչել։ «Փաշինյանն ասում է՝ հայ-ռուսական հարաբերությունները լավ են։ Այնպես որ, այդ հարցը պետք է Փաշինյանին տալ։ Եթե հայ-ռուսական հարաբերությունները լավ են, ինչո՞ւ են եթերում սփռվում հաղորդումներ, որոնք վնասում են հայ-ռուսական հարաբերություններին»,- ասաց նա։
Պատգամավորի խոսքով՝ պետական քաղաքականությունը վարում են իշխանությունները։ Նիկոլ Փաշինյանի՝ 7 տարի առաջ արած հակառուսական հայտարարությունները որեւէ ազդեցություն չունեին հայ-ռուսական հարաբերությունների վրա, բայց այսօր ունեն։ Այսինքն՝ ընդդիմադիրների ու իշխանության հայտարարություններն իրենց ազդեցությամբ հավասար չեն։
Անդրադառնալով կոչերին, որ Հայաստանում պետք է դադարեցնել ռուսական հեռուստաալիքների հեռարձակումը, Արթուր Խաչատրյանն ասաց. «Այդ կոչերը վաղուց են հնչում։ Այս դարում հեռուստակայան փակելն անլուրջ է, նայողը կնայի։ Հասկանալի է, որ այդ կոչերը կհնչեն, դա արտաքին քաղաքական վեկտորի փոփոխության կոմպոնենտներից մեկն է, ինչքան էլ իրենք ասեն՝ մենք նման քաղաքականություն չենք իրականացնում»։
Կարդացեք նաև
Ռոզա ՀՈՎՀԱՆՆԻՍՅԱՆ
